Ralhrang nih Kalay peng, Nichuah Si khua cu mei in an khangh dih ee. Cu lawng siloin khuami minung pathum hna zong an thah rih hna. Hi konghe pehtlaiin khuami nih an chimmi cu ralhrang kawlralkap hna hi khua chung ah an lut i, inn an khangh pin ah khuami minung pathum zong an thah hna.
Ralhrang pawl hna cu nichuah Si khua ah hin phungki sianginn siseh, Ca cawnnak sianginn siseh, khuami inn a dihlak in an khangh dih. An khangh mi inn hi inn 900 a si i, khua inn vialte an khangh dih tiah a chim. Cun ralhrang hna nih khuachung ah a ummi thilman sung hna zong an fir dih. Khuami zong hohmanh an kir lo tiah a chim.
April ni 27 ah Nichuah Si khua ah hin ralhrang kawlralkap le mipi ralkap hna cu fak ngaiin kahdohnak a chuak i, ralhrang kawlralkap lei in a thimi tampi an um hna. Cu hnu ah ralhrang hna nih khua cu a dihlak in mei in an khanghnak hi a si tiah theih asi. Nizan May nithum zongah ralhrang nih cunglei in an kah rih hna.
Thawngpang dang. Nifatin in ralhrang kawlralkap a thimi zat an tam chin lengmang cang. Tuni May nithum kawlram rampi huap in ralhrang kawlralkap le mipi ralkap hna i kahdohnak ah ralhrang kawlralkap lei in minung 55 an thi tiah mipi ralkap lei in thanhnak an tuahmi chungin theih asi. Tuni ah kahdohnak ah mipi ralkap lei in minung paruk nih ram le miphun caah an nunnak an pek ve.
Tuni thanhnak an tuahmi chungah rampi huap in ralhrang kawlralkap le mipi ralkap i kahdohnak ah a thimi ralhrang hna an thihnak hmun le zat hna cu hi hna hi an si. Sagaing ramkulh Mawleih ah ralhrang kawlralkap minung pali thah an si i, Yangon, Kawhmu ah pahnih ralhrang an thi.
Cun Sagaing, Minmu ah ralhrang kawlralkap minung 21 thah an si. Tuni kahdohnak ah ralhrang kawlralkap an thih tambik nak hmun a si. Magway, Poh ah ralhrang pakhat a thi i, Mandalay Cohse ah pakhat a thi. Cun Sagaing chung thiamthiam ah paruk an thi rih i, Sagaing Myaing ah pali an thi tthan.
Culawng siloin Chinram khualipi Hakha peng ah ralhrang kawlralkap minung 13 an thi i, minung pakhat nih ram le miphun caah a nunnak a pek. Sagaing, Yinmapin ah ralhrang kawlralkap pathum an thi i, tuni atu catial tiang an thanhmi chungah ralhrang 55 an thi cang. Mandalay khuachung hotel ah mipi ralkap lei in minung panga an si i, atu tial tiangah mipi lei in paruk an si. Credit:KTM
Leave a Reply