RALHRANG NIH RALZAAM UM AWK HNGAL LOIN AN TUAH HNA E

Yinmarpin Peng Ah Ralzaam Umnak Riahbuk Cu SAC Ralkap Nih An Khangh.Sagaing ramṭhen Yinmarpin peng Bant Bway(ဘန့်ဘွေး) khua i ralzaam umnak riahbuk (thlam) pawl cu SAC ralkap nih July 20 le 21 ah an khanghpiak hna i buk 25 a kaang, tiah tualchung mi nih an chim. Bant Bway ahhin ralzaam riahbuk 50 leng a um i cu chung ah buk 25 cu khangh an si, tiah Bant Bway khuami pakhat nih a chim.

Khuachung um ahcun i thuhnawh peng a si i cucaah ramlak ah kan i ṭhial. Duhsah tein ramlak ah inn tete a hun tam chin lengmang. Cucu SAC ralkap nih an duh lo i rallam an sial pah ah an khangh. Atu ah cun khoika hmun um zong ah zaam peng a hau cang. Nihin zong SAC ralkap hna cu rallam an sial ṭhan i tualchung mi vialte kan zaam dih, tiah tualchung mi nih an chim.

Saw Peng Kahdohnak Ah SAC Ralkap 5 An Thi: Magwe ramṭhen Saw peng in rallam sial ah a chuakmi SAC ralkap hna le tualchung hriamtlai phu hna cu nihnih chung faak ngai in an i kap i, cu kahdohnak ah cun SAC ralkap 5 nak tlawm lo an thi lai, tiah Saw-PDF nih an thanh. SAC ralkap hna cu Saw-Saitphyu lampi Nagapuait tlang ah umhmun khuar ding in timhtuahnak an ngeih lio ah

July 20 le July 21 ah Saw PDF le tualchung hriamtlai phufonh nih an kah hna, tiah theih a si. SAC ralkap hna cu Saw peng tualchung hriamtlai phu PDF Saw battalion 1, PDF Saw battalion 2(YRPA), Lawngshi PDF (YRPA), Ngawng Yan(ညောင်ရမ်း) PDF le Salin PDF phufonh nih an kah hna i, cu kahdohnak ah cun SAC ralkap lei 5 hrawng an thi, tiah theih a si. Credit: The Chin Post.