Ralhrang Nih Taal A Khua Ning Piin An Khangh

SAC Ralhrang nih Taal a Khua Ning piin an Khangh, Falam in Hakha lei ah a rak rami SAC ralhrang nih nihin July 9, zinglei sml. 11:00 hrawng in Taal khua cu a khua ning in mei in an khangh, tiah khua upa sin in thawngpang kan theih. Khuami an zaam dih cang hna i an khua a kanghmi cu a lang in an cuan hna.

Taal khua upa pakhat nih, “Atu hi a kaang cuahmah ko. Inn 3 hrawng lawng a taang cang. Kan khua ning piin an khangh ko. Khuami cu kan zaam dih cang i a lang in kan khua a kanghmi kan cuan,” tiah The Chin Journal ah a chim.

Taal khua hi inn 40 hrawng a ummi khua a si i, kan hnu October 2021 ah khan SAC ralhrang nih inn 11 an rak duah cang. Inn 30 hrawng a tang i nihin ah SAC ralhrang nih an duah tthan caah azapi ngawt in a kaang cang, tiah a cunglei Taal khuami nih a chim. The Chin Journal.

Relchih; Sagaing in Myinmu khua lei ah a kalmi SAC ralkap motor 9 cu, PDF nih July 8 zanlei ah phu kan i ṭhen i, kan kah hna caah SAC ralkap 20 an thi. An motor pakhat a rawk, tiah Myinmu PDF nih cathanh an chuah. Zanlei sml 5:30 hrawng ah Myinmu peng Pyaw le Nabekyu (ပျော့ရွာနဲ့ နဘဲကြူး) khua pawng ah voikhatnak kan kah hna.

Minutes 10 a rauh hnuah Myinmu le HtiSaung khua karah a voihnihnak bomb kan puahhnawh hna, tiah an langhter. “SAC ralkap motor cu voihnih bomb in kan puahhnawh hna. A rawkmi motor pakhat cu a voihnihnak kan puahmi nih a hrawh. Motor a rawhnak pawngkam cu kal ngam a si lo. SAC ralkap nih an congh dih,” tiah Myinmu PDF ṭuanvo ngeitu nih a chim.

Cu kahdohnak ah People Defence Force Myinmu-MMUPDF nih an hruai hna i, Black Eagle Defence Force – MMU၊ Black Hawk Force Myinmu-BHFM၊ People Guerlla Commando-MMU le Myinmu Civil Revolution Force-MMU hna i bawm an kah hna, tiah theih a si.