Nifatin in ralhrang kawlralkap a thimi zat an tam chin lengmang cang. Tuni May nithum kawlram rampi huap in ralhrang kawlralkap le mipi ralkap hna i kahdohnak ah ralhrang kawlralkap lei in minung 55 an thi tiah mipi ralkap lei in thanhnak an tuahmi chungin theih asi. Tuni ah kahdohnak ah mipi ralkap lei in minung paruk nih ram le miphun caah an nunnak an pek ve.
Tuni thanhnak an tuahmi chungah rampi huap in ralhrang kawlralkap le mipi ralkap i kahdohnak ah a thimi ralhrang hna an thihnak hmun le zat hna cu hi hna hi an si. Sagaing ramkulh Mawleih ah ralhrang kawlralkap minung pali thah an si i, Yangon, Kawhmu ah pahnih ralhrang an thi.
Cun Sagaing, Minmu ah ralhrang kawlralkap minung 21 thah an si. Tuni kahdohnak ah ralhrang kawlralkap an thih tambik nak hmun a si. Magway, Poh ah ralhrang pakhat a thi i, Mandalay Cohse ah pakhat a thi. Cun Sagaing chung thiamthiam ah paruk an thi rih i, Sagaing Myaing ah pali an thi tthan.
Culawng siloin Chinram khualipi Hakha peng ah ralhrang kawlralkap minung 13 an thi i, minung pakhat nih ram le miphun caah a nunnak a pek. Sagaing, Yinmapin ah ralhrang kawlralkap pathum an thi i, tuni atu catial tiang an thanhmi chungah ralhrang 55 an thi cang. Mandalay khuachung hotel ah mipi ralkap lei in minung panga an si i, atu tial tiangah mipi lei in paruk an si. Credit:KTM
Thawngpang dang. Lawmh a um tuk hringhran. CRPH kan ti lengmang mi Committee Representative Pyidaungsu Hluttaw/ Pyidaungsu Hluttaw Representative Committee cu Myanmar ram aiawhtu ah chiah dingin IPU timi International Parliamentary Union nih hnatlaknak an tuah. Tutan ah hibantuk in hnatlaknak an tuah hi, Avoi 209 nak International Parliamentary Union meeting cu Indonesia ah tuah a si.
Uknak lei phunglam council nih a tubantuk in hnatlaknak an tuah hi a si. Kawlram nawlngaihnak latu ralhrang kawlralkap dohkalhnak langhternak le Myanmar ram ah a tlamtlingmi Hluttaw kip a chuah khawhnak dingah CRPH cu rampi aiawhtu ah chiah ding tiah hnatlaknak an tuah.Culawng siloin Hluttaw Palai pawl cungah thahrum chuah in cawlcanghnak siseh mipi covo namnehnak hna hi kawlralkap ah a um lengmang tawn i kawlram harsatnak zong a cuan pengmi
IPU General Secretary Martin Chonggao nih CRPH Chairman U Aung Gyi Nyut sin ah cakuatnak zong a ngei. Tubantukin CRPH cu kawlram aiawh tu ah hnatlaknak tuah asi nain IPU Meeting can ah hin vote pek khawhnak an ngei rih lo. Observer dirhmun tu in meeting an i tel kho rih lai. CRPH lei zong nih IPU meeting ah i tel kho dingin an i zuam lai a si ve tiah theih a si.
Leave a Reply