PuṭaO lei ah thilri a chantu SAC ralkap motor ruun Myitgyina pawngah kahdoh an tong 20 nak tlawmlo an thi. PuṭaO (ပူတာအို) lei ah SAC ralkap thil a chantu motor ruun cu Myitgyina khua luh hlan ṬanPhaYe ( တန်ဖရဲ) khuapawng ah June 18, zinglei suimilam 7:00 hrawngah KIA le PDF phufonh nih bomb puahhnawh in an kahdoh hna caah SAC ralkap 20 nak tlawmlo an thi, 40 hrawng hliamhma an tuar tiah KPDF nih an thanh.
SAC ralkap minung thazaang 200 hrawng he motor ruun 60 leng cu KIA le KPDF phu nih ṬanPhaYe (တန်ဖရဲ) le CingKhaYan (ကျိန်ခရန်) khua kar ah pa-de-ta bomb in voi 16 nak tlawmlo puahhnawh in kahdoh an si tiah KPDF phu in ṭuanvo ngeitu nih a chim. “Bomb puahhnawh an si lio ah kan mithmuh in a tlawmbik minung 20 an thi, cun timhcia in kan chiahmi kan hmunhma ah kal in kan kah hna” tiah a chim.
Fakngai in hliam a tuar mi SAC ralkap hna nih raltuknak vanlawng hmang in tualchung hriamtlai phu lei an kahdoh hna tiah theih a si. SAC ralkap motor 80 cu a luancia May 11 in Myitgyina lei ah thazaang 500 hrawng he riahcaw an rak phor i, thlakhat hrawng a rauh hnu Myitgyina khualuh lei ah kahdoh an ton hi a si.
PutaO (ပူတာအို) lei ah riahcaw a phortu SAC ralkap motor ruun cu June 17 ah SuamParaBuam (ဆွမ်ပရာဘွမ့်) le PutaO peng lamthluan ah KIA le PDF nih voi 12 tiang an kahdoh hna. Cu kahdohnak ah cun SAC ralkap riahcaw phortu motor 5 a rawh lengah SAC ralkap 30 leng an thi, minung 60 hrawng nih hliamhma an tuar riah KIA brigade 1 in ṭuanvo ngeitu nih a chim. Crd. The Chin Post.
Leave a Reply