Ralzaam Dirhmun In A Ummi Nu Pahnih Thilton Cu Apoi Tuk Ee

Chin ramkulh Paletwa ah ralzaam dirhmun in a ummi nu pahnih cu June 20 ahkhan bomb i lamhsualnak in hliam an tuar, tiah theih a si. Hliam a tuarmi nu pahnih chung in pakhat cu a hliamhma kong ah thinphang a si ko, tiah tualchung mi nih an chim. An pahnih in Paletwa certual ralzaam umnak sakhan ah aa dormi an si.

Paletwa in meng 6 hrawng aa hlatnak hmunah meh-haang an kawlnak ah bomb an i lamhsual tiah ralzaam bawmchantu Ko Aung Ni nih RFA ah a chim. “Paletwa ralzaam sakhan in meng 6 tluk a hlatnak AbawngTa (အဘောင်သား) khua pawng ah meh-haang an kawl, eiding meh a har caah Rua-tuai an khiak. Faak ngai in hliam a tuarmi nu pakhat cu Sittwe siizung ah kalpi ding in timhtuah cuahmah lio a si,” tiah a chim.

Bomb i lamhsual in hliamhma tuarmi Ma Win Khae Ha, kum-34 cu a orhlei ke a kiak i, a mit khatlei aa hliamh caah a hliam hma a faak ngai. Paletwa siizung in Rakhine ramkulh Sittwe siizung ah kalpi ding in timhtuah a si. Daw Chit Khin, kum 50 cu a hliamhma a fah tuk lo caah Paletwa siizung ah cawnghhramh a si, tiah Ko Aung Ni nih cun a chim. Crd. The Chin Post.