Ram le miphun ca a nunnak a pe mi CNA ralkap hna hmanthlak. 2022 May ni 5, Ram le miphun kilven raltuknak hmun ah a nunnak a petu CNA ralkap pasal tha pali hna hmanthlak cu CIC nih upat peknak le ngaihchiatpinak he nihin ah a langhter.
May 5 raltuknak ah nunnak a petu Chin National Army (CNA) in ralkap pali; Bawino Van Biak Tling, Coporal Thawng Hup Lian, Ralkap Zo Lian Thang le Ralkap Biak Hlei Sang hmanthlak langhter an si. CDF Thantlang zong nih May 5 raltuknak ah ram ca nunnak a petu ralkap pali upatnak le chungkhar ngaihchiatpinak ca an chuah ve. Photo: CIC
Thawngpang dang. Hakha peng kakdohnak ruangah khuami 4,000 leng an zaam. Chin ramkulh, Hakha peng, Chuncung le Dokthek khua karlak ah SAC ralkap le CNA/CDF hna May 3 in May 5 tiang a cangmi kahdohnak ruangah mawtaw lam cungah a ummi Chunchung, Dokthek, Ramthlo, Tlangzaar le Taal khuami 4,000 leng in le lo kaltak in himnak hmun ah an zaam tiah theih a si.
SAC ralkap pawl an rat bak in kan zaam cang, khua pawngah kahdohnak a can tikah kan tih tuk i ram tangah kan zaam. Khua kan zaamtak hnu tlawmpal ah kan inn pawl an khangh colh, ramtang in hmuh khawh a si” tiah khuami pakhat nih RFA ah a chim.SAC ralkap pawl nih an khangh ruangah Ramthlo khua May 4 ah inn 10, May 5 Tlangzaar khua ah inn 16 tiah a zapi te inn 26 a kaang tiah a chim.
Tulio caan hi Chinram ah ruah a sur tawn i ruah khamnak tel loin ramtang ah a zaammi hna caah harnak an tong tiah a khuami hna nih an chim.SAC ralkap nih thongtla 15 phor in mawtaw 27 le tanks 2 he Hakha khua in Kalay lei an kal lioah CNA, CDF phufonh nih an rak kah hna.Kahdohnak chungah SAC ralkap 18 an thi i, mipi hriamtlai minung 10 an nunnak a liam tiah theih a si.
Chin Affairs Federation cazin ning ahcun, SAC ralkap nih hramhram im uknak a lak hnu thok in Chin ramkulh ah a cangmi kahdohnak pawl ruangah khua 313 in khuami 100,000 leng nih inn le lo an zaamtak tiah theih a si.Cu chungah, 60,000 hi ram chungah an zaam i a taangmi 40,000 hi Mizoranm ah an zaam tiah theih a si. Credit: The Chinland Post.
Leave a Reply