SAC ralkap nih hramhram in nawlngeihnak an lak hnu ah Myanmar ram thongtla thidan pek a karh caah thinphang a si tiah Amnesty International nih an chim. Myanmar ramchung biaceihzung in thihdan an pekmi hna hi minung 90 tluk hrawng an phanh caah, kumdang nak in a let 8 a karh tiah Amnesty International(AI) nih 2021 Ramkip thongtla thihdan pekmi record ah an langhter.
SAC ralkap nih mipi sualphawtnak an tuahmi cu SAC ralkap biaceihzung ah transfer in, thih tiang thongtla ding ah biakhiahnak an tuah piak hna tiah AI phu nih an chim. Ramchung ah SAC ralkap nih hramhram nawlngeihnak an lak hnu ah Hlaingtaya, Shwepyita, North Okalapa, North Dagon, South Dagon, Dagon Saithgan peng chung thongtla hna chung in SAC ralkap biaceih zung nih thihdan pekmi an tam tiah theih a si. Credit: The Chin Post.
Thawngpang dang. Senegal ram nitlaklei Tivaouane khuapi umi ”Mame Abdoul Aziz Sy Dabakh” siizung cu May 25 zaanttim ah a kang i nausem 11 an nunnak a liam tiah theih asi.Senegal President Macky Sall nih a nunnak a liammi nausem tete i an nule le an chungkhar hna cu ram pumpi in nan ngeih chiatnak kan in hrawmpi hna tiah a twitter ah a ttial.
Siizung chung i nausem pawl an chiahnak building a kangh caah nausem 11 an nunnak a hi a si i, Inn a kanghnak a ruang cu Electric hri ruang ai thok tiah Mame Abdoul Aziz Sy Damakh siizung ttuanvo ngeitu hna nih an chim.Mei kangh hram ai thok bak in rang tuk in mei a cak tuk colh caah nausem 3 lawng an chanh manh hna tiah Tivaouane khuapi uk (Mayor of Tivaouane)
Demba Diop nih a chim. Tualchung media hna nihcun hi siizung hi an onnak a sau rih lo tiah an langhter ve.Kan hnu April thla chung zong ah Senegal ram chaklei Lingurie khua ah siizung a rak kang i nausem/ Bawhte 4 an nunnak a rak liam cang, Cu lio zong ahcun nau ngeihnak building chung ah chiah mi thli kik petu seh hri in meikangh a rak i thok. Credit: The Chin Post.
Leave a Reply