Salai Lungthlitum. Rev. Tluang Ceu nih a chimmi hi a dik tuk, zaran nih cun an tial ngam theng lai lo. ‘Ralkap uknak tang ah a um i a him tiah a hna ngam i ai nuammi minung cu dalan nan si’ tiah sual phawt a fawi. Hakha cu khuachung i kahnak a um ti lo i khuami hnangam tein khua kan sak kho, inn a kang hraw ti lo, dawr vialte normal tein hon dih a si ko, Thantlang khuami zong inndawng 96 an rak i dor cang, a himnak Hakha rak fuhpanh cio ve hram ko u, kan in zohkhenh hna lai a ti.
Rev. Tluang Ceu. Hakha Khua le Ralzaam Dirhmun. Atulio kan ram sining ruang ah 2021 august thla hrawng in Hakha khua ummi chungkhar tampi nih Hakha cu a himti lo tiin khuate lei mahle chuah semnak khua cio ah chikkhat i dording in a kalmi an tam ngaingai. A bik in Hakha khua ah kahdohnak a tamnak bik Dinlo sang, Chin Oo Si sang, Hakha thar no. 1 iltang hrawng le Hakha thar no. 2 Nahau sang hrawng cu inn a chuahtaakmi an tam.
Langhtermi sang hna hi 30% nihcun an sang an chuahtak tikhawh asi i Nahau tlang cu 60% nih an sang an chuahtak chung ti khawh asi. Asi nain Innral Farhual, Dawrhlun, Pyidawtha, Dawrthar, Khuathar,Kankawlam sang le Cawbuk sang cu a zaam mi an um set lo caah Hakha khua i 80% nih Hakha an hngah ko tiah ruahdamh khawh asi.
Mi tampi nih a lamhlat in an kan cuanh tik ah an kan tihtuk i Hakha cu Thantlang bantuk in chuahtak asi te ko lai a him hlei lai lo tiah an ti i chungkhar tlawmpal Mizo ram tiang a zammi zong a um. Asinain Hakha i an rat le an ra hmuh ahcun amah ningte pei asi ko hi tih awk zeihmanh a um tung lo an ti. Hakha khuahlum pawl nih Hakha chuahtak ding cu an ruat naisai lo.
Kan pupa chan in kanmah ram asi i kan Chinram khualipi zong asi caah kan kilven lai i midang kan kian hna lai lo tiah Hakha khuanu khuapa, Rual Uu le Hakha hruaitu hna nih biachahnak ngeih asi cang. Zeitluk in kahdohnak a um zong ah Hakha cu zaamtak an tim lo tikha zapi nih hngalhding a herh. Online in mi tlerkhawnh a hmangmi hna khi zumhding an si lo.
Atu ah Hakha khua cu ningcang tein zarhpi ni pumhnak, nupi thit puaituahnak tbt zong tuahdih asi bantuk in Rawldawr le thil zuarnak dawr vialte zong hundih an si cang. Cucaah khuate lei ah rethei ngai le siarem lo ngai in a thudir mi hna zong nan inn te rak hlamding zong ah tihphan tukding asi tilo kan vengsang kan innpa le kan Khrihfabu hna zong him tein atutiang an um cio ko tikha kan thinlung put asi awk asi.
Cu leng ah Thantlang khua in khuate lei ah hartuk in a va ummi kan unau hna an kong kan ruah ah kan celh hrimhrim lo. A hlei in tar le ngakchia, ngandam lomi vialte caah zeitluk indah a har ticu ruahdamh khawh cio asi. Thantlang cu fuhding a um rih lo caah Hakha ah rak tlung cio hna ulaw a thadeuh hrimhrim ko hnga. Kan harnak le kan fawinak, ngaihchiatnak le lunglawmhnak zong ah kan i hrawm cioding a si. Hakha fuh hi ttih hlah usi.
Thut umnak, Eidinnak, Sii le ai kong ah, chiat ni thatni ah tlam a tling in hna a ngamdeuh hrimhrim lai. Hakha i umchung hi a thacem ko ti a hngalmi hna duhsah tein a rak i thialmi Thantlang inn 96 hrawng an si cang. Anmah tein i tawlrelnak komiti tezong an ngei cang rakra cio hrimhrim ko hna u. Hakha IDP camp le inn lawngmi zong tampi a um. Thut umnak tawlrel ding in Khrihfa bukip timh cia an sidih fawn.
Ramleng um miphun hawi vialte hna zong nih nan chungkhat nan unau hna kha Mizo ram le Malaysia kal kha forhfial ti loin Hakha fuhpanh tukha forh hna ulaw a thadeuh ko hnga lo maw. Hakha khua ah i funtom usilaw kan khua kan ram rilveng ko hna usi. Bawipa nih kan huppheng cio ko seh.
Leave a Reply