RIP.CNA RALKAP PAKHAT NIH A NUNNAK A PEK TTHAN E

Matupi Peng Ralram Pakhat Ah Bomb I Puah Sualnak In CNA Ralkap Salai Shiang Sang A Nunnak Liam. Lawngtlai, 21 Biangreithlep 2022: Chin ramkulh, Matupi pengchung ralram hmun pakhat ah bomb i thlahphoih sualnak in CNA ralkap pakhat a nunnak a liam tiah theih a si.

Nunnak liammi hi CNA ralkap Salai Shiang Sang CDF-Matupi Battalion 3 i hruaitu a si, ram le miphun caah ralhrang kuttang in lutnak hmuh i Democracy hmuhnak ding caah rian a tuan cuahmah lio ah bomb i thlahphoih sualnak in a nunnak a liam tiah CDF-Matupi in tuanvo ngeitu nih a chim.

Biangreithlep chung ah bomb i thlahphoih sualnak in Chinland ralkap 2 an nunnak a liam, 7 Biangreithlep ah Chin National Defense Force in ralkap Salai Sui Thawng cu bomb thianhhlimhnak an tuah lio ah bomb a puah caah miphun le ram caah a nunnak a liam.TLT

Thawngpang dang. Ralhrang 40 An Thi. Sagaing ramṭhen Ye-Oo peng Poahta khuachung mei in a khaangtu SAC ralkap hna cu an kir lei, May 19 chunhnu suimilam 3:30 ah bomb puahhnawh an tong, tiah theih a si. SAC ralkap hna cu minung 100 hrawng an si i, Ye-Oo in Poahta lei an kal lio ah Poahta khua cu an khangh, an chuahlei ah tualchung hriamtlai phufonh nih bomb an puahhnawh hna caah kahdohnak a chuak.

SAC ralkap hna cu timhcia tein hmanh mi bomb in puahhnawh an si i, pee(ft’) 100 tluk naih in kan kah hna caah an dihlak ngawt in hliamhma an pu,” tiah YeeOo PDF in nawlngeitu pakhat nih a chim. Minutes 20 tluk kahdohnak ah SAC ralkap 40 hrawng an thi i, an ruak cu Tayattaw(သရက်တော) khua pawng ah an khangh hna, tiah a chim chap.

Kahdohnak a chuah hnu in SAC ralkap hriamngan kahnak ruangah civil mi 5 an nunnak a liam i, 10 nih hluamhma an pu, tiah theih a si. SAC ralkap hna cu YeeOo PDF, YeeOo pah-kah-phah phu, Shweboo pengkomh battalion le KhinOo PDF nih an kahdoh hna, tiah theih a si. Credit: The Chin Post.