RIP. Ralhrang nih khuami pahnih an thah hna. Nizan June Ni 18 zingka suimilam panga hrawngah ralhrang kawlralkap Sagaing ramthen Wat Lat peng, Lat Kauh khua le Htung Bu khua ah hriamnam ngan an kah ruangah khuami pahnih an thih pin ah minung pakhat zong a kut ah hliam a tuar tiah theih a si.
Ralhrang kawlralkap hna cu khuachung ah an lut i, inn zong inn 10 an khangh tiah an langhter chih. Hriamnam an kahmi hna cu ralzaam umnak lei a tla. Ralhrang hriamnam nih a thah mi le a hliammi hna hi pumpek in rian a ttuanmi ralhrang an rat le rat lo a zohtu hna an si tiah an chim.
Duty mi minung pathum pawngah ralhrang kawlralkap hna hriamnam cu a tla i a puak. Curuangah a tubantuk in an nunnak a liam le hliam an tuarnak hi a si tiah khuami pakhat nih a chim. Athimi hi Htung Bu khuami Ko Aung Kyi kum 35 le Lat Kauh khuami Ko Kyaw Lwin kum 26 an si. Hliam a tuarmi zong Htung Bu khuami a si tiah an chim.
Thawngpang dang. Monywa ah ralhrang nih District council member ah an thimmi kahthah a tong. Tuni June ni 19 zingka suimilam pakua ah Sagaing Ramthen Monywa ah ralhrang council member ah an thimmi minung pakhat an kahthah tiah theih a si.
A thimi hi Monywa i Chain Myawaddy sang i a ummi Council member Tan Zaw Htun a si.Amah hi kum 40 minung a si. Tuzing ah khuapi ah motor in a kal lio ah an kahthah mi a si tiah khuami pakhat nih a chim. Amah hi Monywa District zung in a rak ra i, motor a mongh lio ah a tubantuk in an kahthah hi a si.
Motor chungah a thi tiah an chim. Monywa khuapi cu a dihlak ti ngawt in ralhrang nih an phih ti a si.Tuni ah kahthah a tongmi District Council chungtel pakhat Tan Zaw Htun thahnak konghe pehtlaiin mizei dah a thattu an si i, zeibantuk phu nih dah an thah timi theih a si rih lo.
Leave a Reply