Htawai Khuami Pakhat Cu Tlaih A Ton Hnu Nikhat A Rauh Ah A Ruak In A Chungkhar Nih An hmuh!: Tanintharyi ramṭhen, Htawai (ထားဝယ်) ah kum 51 tluk a si mi U Soe Myint cu SAC kuttang um pyi-tuh-sit phu nih August 4 zaanlei ah bia hal ding in an auh hnu ah, nihin August 5 zinglei ah cun a ruak in hmuh a si, tiah Htawai (ထားဝယ်) khuami pakhat nih a chim.
U Soe Myint cu nizaan August 4 ah pyi-tuh-sit phu hna nih mi sawhsawh thuam i hruk in “Bia hal ding a um caah chikhat in kan zul ta” tiah an auh. Nihin August 5, zinglei ah cun a ruak hlam ding in chungkhar an thanh hna, a ruak cu Htawai(ထားဝယ်) peng Palukung(ပုလုကုန်း) khua pawng lamkam ah an hlonhtak” tiah khuami pakhat nih cun a chim.
U Soe Myint te chungkhar cu Htawai(ထားဝယ်), Bamaw (ဘုမ္မော်) sang i an umnak kum hnih hrawng lawng a si rih, tiah khuami nih an chim.U Soe Myint thah a tonnak kong ah SAC ralkap lei nih cathanh an chuahmi a um rih lo. Htawai(ထားဝယ်) ah SAC ralkap uk duh lo langhternak a tam chin i, i thahnawnnak zong a tam chin, tiah tualchung mi nih an chim.
Tanintharyi ramṭhen chung a cangmi thilsining hlathlaitu phu pakhat ‘Southern Monitor’ nih cun, Tanintharyi ramṭhen chung ah June 2021 in June 2022 tiang ah kahdohnak voi 116 a chuak i, voi 119 bomb a chuak. Thahnawnnak tiang a chuahpi mi buainak voi 173 tiang a um, tiah an langhter.
AAPP nih cazin an langhter ning ah cun SAC ralkap nih uknak an lak thawk in August 4 tiang ah, democracy hmuhkhawhnak ding ah cawlcanghnak a tuahtu hna hna chung in minung 2157 nunnak a liam, cang tiah an langhter. Credit: The Chin Post.
Thawngpang dang. Thlanglei Kalay ah kahdohnak a fak i SAC ralkap 15 an thi, PDF 3 an nunnak a liam. Sagaing ramṭhen, thlanglei Kalay, Tayakone khua ah hmunhma a khuarmi SAC ralkap le mipi hriamtlai phufonh hna August 3-4 ah kahdohnak a fak i SAC ralkap 15 an thi, PDF 3 nih ram caah an nunnak an pek tiah theih a si.
Kalay Technology University thlanglei Tayakone August 2 ah hmunhma a khuarmi SAC ralkap cu PDF-Kalay battalion 1,2,3,5,6,8,12, mipi vengtu Kalay phu, CNDF, CDF-KKG, RKDF phufonh nih August 3 zaanlei sml 5:00pm ah an kah hna.August 4 zinglei sml 9:00am hrawng in chunitlak kahdohnak a chuak ṭhan i ni 2 chung kahdohnak ah SAC ralkap 15 an thi i tampi nih hliamhma an tuar tiah PDF-Kalay nih a thanh.
Nihnih chung kahdohnak ah mipi hriamtlai phufonh lei in PDF-Kalay hriamtlai 1, mipi vengtu phu hriamtlai 2 tiah hriamtlai 3 an nunnak a liam i PDF-Kalay hriamtlai 10, CNDF (Vakok) hriamtlai 2, mipi vengtu phu hriamtlai 4 le RKDF hriamtlai 1 tiah an zapi 17 hliamhma an tuar tiah a thanh.SAC ralkap pawl nih Tayakone khua mipi inn cheukhat zong an khangh tiah theih a si.
Thlanglei Kalay ah kahdohnak a fah lioah Chaklei Kalay Tamu in Kalay lei ah a rak raami SAC ralkap mawṭaw 14 le hmaikal piaktu ralkap 60 hrawng in bom thianh dingah ke in a kalmi SAC ralkap pawl cu zinglei sml 11:00am hrawngah meng 55 pawngah PDF-Kalay nih bonrap lung 12 in an puah hnawh hna caah SAC ralkap 20 hrawng a hmun ah an thi i, tampi an i hliam tiah PDF-Kalay nih a langhter.
Bom puah ruangah fahnak a tuarmi SAC ralkap pawl cu meng 55 a pawngkam khua mipi an tlaih hna i zaanlei sml 6:00pm hrawngah Yazakyo khua lei ah hriamngan in an kah lengmang i kahdohnak zong a chuah caah a thimi an um le um lo a fiang in theih a si lo tiah PDF-Kalay thawngthanhnak in theih a si. Credit: The Chinland Post.
Leave a Reply