RIP. PDF MINUNG PANGA NIH AN NUNNAK AN PEK CANG EE

Sagaing ramṭhen, Buhtalin peng ah SAC ralkap nih nitin ngawt in rallam an sialnak ni 10 tluk a si cang i, PDF nih an rak kah ve lengmang hna caah PDF in minung 5 an nunnak a liam cang. May thlachung Buhtalin peng ah SAC ralkap cu hmunhnih in rallam an sial i, khua pathum ah mizapi inn hna cu meikhangh in an hrawhpiak hna.

Tualchung hriamtlai phu hna he atu le tu ti tluk in an i kap. Buhtalin peng tualchung hriamtlai phu in ralkap 5 an nunnak a liam i, SAC ralkap lei 10 hrawng an thi ve, tiah khua mi nih an chim. May thla thok in nihin May 11 tiang SAC ralkap pawl cu thazaang 100 lengmang he Buhtalin pengchung ah rallam an sial tawn.

Gantit khuachung mei an khangh ruang ah kum 78 tluk tar pakhat cu meikanghnak in a nunnak a liam. Cun, Oakphu khuapawng Yawgi sianginn ah a zaam mi minung 9 cu a ruang um lo in SAC ralkap nih an rak thah hna, tiah theih a si. Credit: The Chin Post.

Thawngpang dang. Myaung Le Yesakyao Kahdohnak Ah SAC Ralkap 14 An Thi. Sagaing ramṭhen Myaung peng in Magwe ramṭhen Yesakyao peng ah rallam sialtu SAC ralkap hna cu tualchung hriamtlai phu hna nih voihnih tiang bomb an puahhnawh hna caah SAC ralkap 14 an thi, tiah MGN 35 pah-kah-phah sin in theih a si.

SAC ralkap voikhatnak kah an ton cu May 3 ah khan a si i, Myaung peng Nabatsanpiah khua le Tawnggyi tualchung hriamtlai phu hna nih an rak kah hna. Cu kahdohnak ah cun SAC ralkap 9 an thi i, midang 7 nih hliam an tuar. SAC ralkap hna sin in bomb le kuan zeimawzat lengah a herhmi catlap(document) an laak, tiah theih a si.

A voihnihnak kahdoh an ton cu May 7 ah a si i, Myaung peng le Yesakyao peng kar ah um mi khua hna khaang ding ah a kal mi hna cu tualchung hriamtlai phu hna nih zinglei suimilam 9:00 hrawng ah pa-de-ta bomb lung 3 in an doh hna. Cu kahdohnak ah cun SAC ralkap 5 an thi i, 9 hliam an tuar, tiah theih a si.

SAC bomb puahnak ah cun MNG 35 pah-kah-phah phu, The value of Young man (Tawngta), Myanmar Fighting Defense le Hnalung Hlah Lu Mait Gyi phu hna an i tel, tiah MNG 35 pah-kah-phah phu nih an thanh. SAC ralkap nih Yesakyao peng khua 9 cu meikhangh in an hrawhpiak hna caah mipi hna cu a himnak hmun ah an zaam hna, tiah theih a si.