Ngaihchiatnak Thawng. Ralhrang kawlralkap nih kum 6 hngakchia telh in chungkhar an kahthah hna. Shan ramkulh Maisoe peng Maikuang lampi ah umhmun a khuarmi ralhrang kawlralkap hna nih Maisoe peng chungah ningcang loin hriamnam an thlah ruangah hngakchia kumruk te lawng a simi le a dang minung pahnih an kah hna tiah an thanh.
Sai Thiha le a nupi Nan Sai Lu cu an fa kum ruk a simi sianginn a kaimi an va hlam. Inn lei an tlung lio ah ralhrang kawlralkap hna nih an motor cu an kah. Motor chungah hringtu a nu le a fa kumruk hngakchia te cu an thi colh. Hringtu an pa zong sizung ah an kalpi nain a zan lila a nunnak a liam ve.
Hi konghe pehtlaiin khuami pakhat nih a chimmi cu An fate hi Maisoe khuapi chungah sianginn an kaiter i an va don lengmang tawn. Maisoe in khua an tlun lei lampi ah ralhrang kawlralkap hna nih an kah hna. Ralhrang minung pahnih hna hi uniform zong an i hrut lo. Hringtu pa bik a thih lo caah nam in an sawh rih. Cun motor chungi a ummi an thilri zong an lakpiak hna tiah a chim.
Thawngpang dang. CNA lei nih thawngpang fiang an thanh cang. Ralhrang kawlralkap he i kahdohnak ah ralhrang kawlralkap minung 67 nak tlawmlo an thi. Matupi peng le Hakha Kalay lampi ah ralhrang hna le Chin ralkap fonh hna i kahdohnak ralhrang minung 67 nak tlawmlo an thi i, mipi ralkap lei in minung pahnih nih ram le miphun caah an nunnak an pek. Chin ramkulh Matupi peng le Hakha le Kalay lampi ah ralhrang kawlralkap Chin ralkap fonh hna cu kahdohnak fak a chuak. July ni 7 in July ni 16 an i kap hna.
Ralhrang lei in minung 67 nak tlawmlo an thi i, mipi ralkap lei in minung pahnih nih ram le miphun caah an nunnak an pek tiah CNF/CNA nih thanhnak an tuah. July ni sarih ah Matupi peng Amlaik khua ah ralhrang kawlralkap le CNA, CDF Matupi, CDF Zotung fonh hna kahdohnak a chuak. Kahdohnak ah ralhrang kawlralkap minung pahnih nak tlawmlo an thi i, minung paruk hliam an tuar. Cun July ni 6 ah CDF Matupi le ralhrang hna cu Rengkhen le Amlaik karlak ah an i kap tthan i ralhrang minung 5 an thi tiah an thanh.
July ni 13 ah Hakha khuachung ralhrang gate le palik sakhan hna cu mipi ralkap lei nih an kah hna i a thimi an tam lai tiah kan zumh tiin CNF nih an langhter rih. July ni 8 in July ni 16 tiang Hakha le Kalay lampi ah ralhrang kawlralkap hna le Chin ralkap fonh hna cu voiriat nak tlawmlo kahdohnak a chuak. Ralhrang lei in minung 60 nak tlawmlo an thi.Hi kahdohnak ah Chin ralkap hna cu CNA, CJDC, CDF Thantlang, CDF Hakha le CNDF fonh hna an si. Ralhrang kawlralkap hna cu Kalaymyo in Falam, Hakha lei ah motor 27 in an ra i, ralhrang hi minung zahnih hrawng an si lai tiah zumh a si. Lampi an rat pah ah lamka ah a ummi Varung khuami pakhat an thah pin ah Taal khua ah inn 29 an khangh i Tlangzar ah inn ruk le Chuncung ah inn 15 an khangh tiah an langhter chih.
Leave a Reply