SAC RALHRANG SNIPER IN AN KAH HNA

ThanTaung Khuapi, Post Office Lamton Ah SAC Ralkap Sniper In An Kah Hna, Sergeant Pakhat Thi Kayin ramkulh, ThanTaung (သန်တောင်) khuapi, Post Office lamtonnak ah a tlungkal mi mipi hna checknak a tuahtu SAC ralkap phu cu nihin June 20 zinglei Sml 9:40 hrawngah ThanTaungPDF nih Sniper in kan kah hna i SAC ralkap Sergeant pakhat a nunnak a liam tiah TanTaung PDF nih cathanh an chuah.

Kahdoh hnu ah SAC ralkap hna nih a pawngkam hrawngah an kah hrawk i check nak hna an tuah khawh caah mipi hna nih ralring tein tlungkal uh tiah an thanh. SAC ralkap 15 hrawng cu cu kahdoh an ton nak hmun sianginn ah an i dor i lam ah a chokmi hna cu an check hna tiah theih a si.

Relchih; Kachin ramkulh, HphaKan peng HmawSiSa le Lungkhin (မှော်စီဆာနှင့်လုံးခင်း) khua aa pehnak ah dalan pa 3 cu, an ban an leh hna i an thah hna. An ruak cu nihin June 20 ah an hmuh, tiah tualchung mi hna nih an chim. Nihin June 20 deilei sml 2:00 hrawng ah Hmaw SiSa le Lungkhin khua aa pehnak lakphak dawr kam ah meithal in kah thah an ton hi a si, tiah tualchung mi pakhat nih an chim.

Thah a tongmi hna hi dalan an si tiah an min a thang ngai. An pathum ning tein an lu ah meithal in an kah hna. Zing sml 6:00 hrawng ah pakhat cu a thi rih lo. 7:00 hrawng ah an ruak cu mizaw phorhnak motor nih a rak lak hna. An pathum ruak cu June 20 zing lei ah an hmuh hna, tiah a chimchap. Thah a tongmi pathum cu TawHmaw (တောမှော်) khuami kum 60 hrawng, Ma Suat Yan (မဆွပ်ယန်) khuami kum 50 hrawng le Sai Gya Buam (ဆိုင်းဂျာဘွမ်) khuami kum 30 hrawng an si.

Mi zei nih dah an kah hna ti cu an hngal kho lo, tiah theih a si. A luancia May 31 lio zong ah Hpakan peng MatLin Chaung (မက်လင်ချောင်) khuami 4 zong thah an rak tong bal cang. Hpakan peng chung ah 2022 kum SAC kuttang rianṭuan khuabawi le dalan tiah hngalhmi hna cu atu le atu thah an tong i, June thla tiang ah thah a tongmi 20 an si cang, tiah theih a si. Crd. The Chin Post.