SALAI BAWI ZA CEU AW KAN TUAR KHO HRIMHRIM LO E

Bomb Puah Sualnak in Salai Bawi Za Ceu a Nunnak a Liam. Nihin July 5 ah Thantlang peng ralram hmun khat ah bomb puah sualnak in CDF-Thantlang ralkap Salai Bawi Za Ceu a nunnak a liam, tiah thawng kan theih. Bomb an tonghthammi nih minung pahnih a puah hnawh hna i Salai Bawi Za Ceu hi a hmun ah a nunnak a liam. A dang pakhat hliamhma a pu, tiah kan theih. Credit: The Chin Journal

Atu bantuk in Thantlang CDF pasalttha Salai Bawi Za Ceu nih a nunnak a pek mi cungah Chinmi vialte kan lung a fak tuk hringhran. Tantaak mi chungkhar Bawipa tu nih nan ngaihchiatnak le nan mitthli vialte in hnawk ko hna seh. Nan ngaihchiatnak kan in hrawmpi hna i, ram le miphun caah na nunnak na pek, upatnak sangbik kan in pek.

Thawngpang dang. Myaing Peng Ah Rallam A Sialtu SAC Ralkap Kah An Si I, 3 An Thi!: Nihin July 5 ah Myaing peng chaklei khua hna ah rallam a sialtu SAC ralkap hna cu tualchung PDF nih an kah hna caah SAC ralkap 3 an thi, tiah Myaing Villages Revolution Front (MVRF) nih an thanh.

MVRF in rianngeitu pakhat nih cun, “Tayatkaan(သရက်ကန်) camp in Myaing peng chaklei khua hna ah rallam a sialtu SAC ralkap 60 he kan i kap i, SAC ralkap 3 tluk an thi. Zinglei Sml 7:40 in Sml 9 hrawng tiang kan i kap. kanmah lei hliam tuar um lo tein hnu kan tolh kho,” tiah a chim.

Kahdohnak Ah NuaHṭugyi Um SAC Ralkap 3 An Thi I, 9 Hliam An Tuar: Mandalay ramṭhen NuaHṭugyi khuachung ah umhmun khuarmi SAC ralkap cu July 4 zaan suimilam 7 hrawng ah NuaHṭugyi PDF nih an kah hna i, cu kahdohnak ah cun SAC ralkap 3 an thih lengah midang 9 hliam an tuar, tiah NuaHṭugyi PDF nih an thanh.