SALAI VAN BIAK THANG: A KAPKAP IN CAWLCANGH ZIA THIAM KAN HAU

Salai Van Biak Thang: A Kapkap In Cawlcangh Zia Thiam Kan Hau.Pumpak kong si loin ram le miphun kongah kan buai. Khrihfabu pakhat kong si loin mizapi kongah kan buai hna. Ralkap uknak a tem-ing ciami lawngte kan si ngawt hna caah cu uknak chungah kir than kan duh ti lo. Kan lung aa rual; kan lung aa fun i kan duhmi le kan i tinhmi aa khat dih.

Cu ruangah kan zapi tein kan buai ti hna. Lang ngai in lam a zawhmi kan um hna lai. Hmunthur a rak charmi mino zong kan um hna lai. A mui hmuh theng loin a aw lawng kan theihmi zapi zulh ding a autu kan farle zong kan um hna lai. Zapi hmai ah bia a chim khomi le UN le ramdang cozah thawng a rak thanhtu zong kan um lai.

Innchung tangte ah thla a rak cammi zong kan um lai. Mizaw a rak zohkhenh i a rak thlopbultu zong kan um lai. Thongtla kongah zapi hmuh loin a rak buai i a cawlcangmi zong kan um lai. A tlizaammi hna caah lam le sul le dornak a rak tawlreltu zong kan um lai. A kapkap in kan rak cawlcang cio. Atu bantuk ram le miphun le mizapi kong i buainak ahhin a kapkap in riantuan a rak herh timi kha kan i fian cikcek a hau.

A chunglei in pehtlaih zia le biakchawnh zia tu kan thiam a hau. Phundang in kan chim ahcun a thapthap in kan um hna i ralkap nih khehkhuai khawh lomi, ciktan khawh lomi le hrawh khawh lomi phu kan si hau. A leng lawng si loin a chungah kan feh, kan chah deuh i kan hram a hngeh deuh a biapi. Nikhat hnu nikhat zeitindah kan umkal lai i zeidah kan tuah lai i zei lam kan kal ahdah kan i tinhmi kan phak khawh lai timi ruah thiam zong a biapi.

Cucu mirang nih ‘strategy’ an timi cu a si. Ralkap zong nih ‘strategy’ a phunphun an hman cang i a hman than lai. Mizapi zaangdernak, connak le tihphannak dingah a phunphun lam an kawl lai. Thisen zong an luanter cang.Hi pinah a dangdang an tuah rih lai. Asinain, mizapi nih teinak kan hmuh khawhnak hnga a kapkap in, a thapthap in riantuan zia kan thiam a hau ko.