Tipil Innak ah Zumhnak 2: (Rambuai lio a si. I el hi tha ka pe loh. El-hniarnak ah si loin, kan zumhnak fianternak ah, hawi le hmaikhah lo buin, kan van thai).Pa, Fapa le Thiang Thlarau min in tipil va pe hna uh” (Mtt 28: 19). (Pa, Fapa le Thiang Thlarau min in tipil an pek hna ti zong a um lo i, an ing ti zong aum lo).Jesuh Khrih min in tipil an ing” (Lam 2: 38, 18: 48, 10: 48, 19: 5).(Jesuh min in tipil va pe hna uh, ti le, an pek hna ti a um loh. An ing ti voi 5 ah a um). Cu cu kan buainak a si.
Tipil pek kong ah ruahnak/zumhnak 2: Pa, Fapa le Thiang Thlarau min in pek ding” ti zumhnak (Trinity). Jesuh min in pek ding” ti zumhnak (Oneness). A peknak kong buaipi bik a si caah, peknak ka focus ve lai.An 2 in Bible ah dengteu in an um ve ve loh. “Pa, Fapa, le Thiang Thlarau” min in an pek hna, ti zong a um lo I, “Jesuh min in an pek hna” ti zong a um ve fawn loh. “Ruahdomhnak” ve ve an si. Cu bantuk cu Tehte he tha tein langhter khawhmi long zumh ding.
Pa, Fapa, le Thiang Thlarau min in tipil pek. Ka purhdah khawh tawk ah, “Pa, Fapa le Thiang Thlarau” min in tipil an pek hna ti hi, Bible chirchanh a thawng lo. “Pa, Fapa le Thiang Thlarau min in tipilnak va pe hna uh” ti hmanh khi, bet chom mi a si tiah a zummi Bible thiam zeimawzat an um.Jesuh min in tipil pek. Jesuh min in tipil an pek hna ti a um loh. “Jesuh min in tipil an ing” ti cu voi 5 a um.
Oneness pawl cu English grammar an thiam lo caah, an nawnnok dih ti a lar ngai. Fb ah ka hmuh len. Hi tluk a kan domi nihcun kan zumhnak hi, Mirang ram in ai thok ti tal cu an kan theihpiak awk a si nain. Cun, tuchan rilmal ah English hmanh thiam lo viar a kan puh ngamtu caah Bible an thiam lo ti chin chin cu an I fawih tuk awk hrim a si, ka ti.
Mirang ca hi ka thiam loh. Nain hei chim ve ko ning! “They were baptized in the name of Jesus” ti khi “Jesuh min in tipil an ing” ti nak in, “Jesuh min in tipil in ter an si” ti a dik deuh. Passive voice ahcun annih cu a cohlangtu an si cu mu. Cu caah an ing (a tuahtu dirhmun) tinak in, in ter (a cohlangtu) an si ti a dik deuh mi a si. Passive le Active voice an thei lo, ti a si caah hei peh ning. Tipil an ing, ti khi Passive voice an si reng. Active voice in tlen ahcun “Paul/Peter/someone baptized them in the name of Jesus” ti a si hnga.
Paul/Peter nih Jesuh min in tipil a pek hna” ti a chuak hnga. Kanmah zumhnak a dirhthoh lehlam. Thil pakhat a um rih. Passive a si zong ah, Active a si zong ah, khi catlang I, “in the name of Jesus” Jesuh min in, ti khi ai thleng kho loh. Tanglei pawl hi zoh rih hmanh! Jesuh min hman ding in cawnpiak kan si.Mithiang Paul nih, “Na tuahmi poh ah Jesuh min in si dih ko hna seh” (Col 3: 17).
Mah hi Jesuh min hman a dotu hna nih, “Jesuh min in rawl ei, ti din le zun thawh tiang kan tuah ne lai” an ti ka theih bal. Biateinak sawh ah chimmi a si. Anmah hmanh nih an zum lai loh. A faing ko mi cu, Pathian thawnnak langh a herh khunnak le hman a herh khunnak ah Jesuh min hman ding cawnpiaknak a si.Jesuh min hi mizaw damnak ah an hman.
Peter le Johan nih mizeng pa kha, “Nazareth khuami Jesuh Krih min in tho law, kal kan ti” tiah Jesuh min chim/auh in an dam ter. (Lam 3: 6). Damnak ah Jesuh min an hman. Jesuh min hi khamhnak caah pek mi a si.Kan nih khamhnak caah Jesuh min long pek kan si” (Lam 4: 12). “A min ah Jesuh nan sak lai, zeicahtiah, a mi hna kha an sualnak chung in a khamh hna lai” (Mtt 1: 21). Pathian min le a riantuanning then awk an tha lo ti cu, Bible thuk deuh cawng nih an theih dih mi a si (Ai tumcopnak ah Jehovah-Jireh) ti bantuk.
Jesuh min in thlacam ding fial kan si. An cam fawn. Ka min in nan halmi poh cu kan tuah piak hna lai” (John 14: 13) Zeipoh ka min in nan ka hal ahcun ka tuah lai” (John 14: 14). Bawipa min a aumi poh cu khamh an si lai” (Rom 10: 13) Bawipa Jesuh ka thlarau kha cohlang ko” (Lam 7: 59) Bawipa, hi sualnak hi an cung ah khing hlah” (Lamkaltu 7: 60). Jesuh min hman ding” cawnpiak kan si pin ah Zumtu hmasa nih an hman fawn. Cu pin ah “Jesuh min in an ing/in ter an si” ti asi fawn caah, UPC nihcun Jesuh min in kan pek/in ter hna.
Cu pin ah “Pa, Fapa le Thiang Thlarau min in tipilnak va pe hna uh” tiah rak chimhmi Lamkaltu pawl zong nih Jesuh min in an inter fawn hna. Bible relnak zulhphung biapi pakhat cu, “Zeitindah a rak theitu (first audience) nih an theih, an fian ti kha a biapi bik. Anmah rak chimhmi a si cu mu. Cu caah kan dirhmun a fek in ka ruah.Ka khuaruah a har ngaimi cu, zumtu tampi nih, thlacamnak ah, mizaw damnak ah, khuachia thawlnak ah Jesuh min hman kan duh i, kan hman ko.
Nain (sak hnawh channak) Khamhnak caah hman kan duh lo pin ah a hmangtu pawl hna zong, hruh le ngat vialte kan phot hna hi a si. Kannih cu Bible ning in (Biakinn on, Kutsih thlacam, thlacam) ah Jesuh min kan hman zungzal ko lai. Tipil in cu Khamhnak a si maw? Tipil in hi khamhnak kan ti bal loh. An kan puhmi sawh a si. Kan dirpi mi cu, “Jesuh Krih zumh, a min in tipil in hi khamhnak a si.
Bible cawnpiaknak a si caah a si. Hmun tampi ah a um. Jesuh nih “Ti le Thlarau in nan hrinthan ding, a zum I tipil a ingmi cu khamh hmuh ding” a kan ti. Peter nih (khamhnak kong ah dengteu in an hal ah) “Jesuh Krih zum uh, a min in tipilnak ing uh” a ti hna. Paul nih a zummi tipil a in ter hna. Philip nih a in ter hna.
Khamhnak cu Pathian vel long in a si. Minung tuahsernak a si loh, ti he ai kalh maw? Kalh naisai hlah. Hi hi ruat hmanh! Jesuh Krih nih Vailam cung ah Khamhnak a ser. Ai lim cikcek. A si ah, mi vialte automatic in khamh kan si maw? Si naisai hlah.Zeitindah a si ne? Cohlan a hau. Cu cu zumhnak kan timi cu a si.Zumhnak cu zeidah a si? Thluak hngalhnak asi lo, ti cu kan cohlan dih.
Khuachia hmanh nih hngalh cun a hngalh. Zeitindah a si ne? Mirang nih “Active Response”, a nungmi cohlannak, timi nih a fianter ngai. Thawngtha cohlan a hau. Thawngtha cu zeidah a si? “Khrih Thihnak, Vuinak le Thawhthannak kha a si” (1Cor 15: 1-8). Cucu zeitindah kan cohlan lai? Zumhnak in, “ti chung I tipil kan vung in ah khan amah he vui ti kan si I, thihnak ah khan kha thi ve…. Amah he kan tho ve lai” (Rom 6: 4, Col 2: 12). Phundang in chim ahcun, zumhnak ah tipilnak ai tel.
Zumhnak hi Thawngtha zulh (obey) a si. Bible hmun tampi ah a um. Paul nih “Amah nawl a ngaimi khamh awk ah a ra” (Hebrew 5: 9). Thawngtha a zum lomi (do not obey) dantat an si lai (1 Peter 4: 17). “Sihmanhsehlaw an dihlak cun thawngtha an pom (obey) lo” (Rom 10: 16). A si ah, Pathian vel cu zeidah a si kun? Misual, Pathian he ai rem kho lo ding, kan caah, amah Pathian nih a vel in khamhnak a kan ser piak. Cu cu Vel cu a si. Zumhnak a si zong, tipilnak a si zong, Pathian Vel lo cun pakpalawng an si hnga.
Thihnak le Nunnak dawh a si hih.Jesuh nih thihnak hmanh nih a tei lo ding Krihfabu ka dirh lai a ti (Mtt 16: 18). Amah nih a dirh loh. Lamkaltu tuanvo a pek hna. Pentecost ni ah an dirh. An dirhning cu “Jesuh zumh, a min in tipilnak innak” in a si. Hi bia hi larnak sawh sawh caah a si loh. Nang na pial, na hngal loh, nan thiam loh, I ti sawh sawh ding kan si loh (Angai te ti ahcun, ka thiam bik, ka hngal bik, ai timi kan level cu ai thei pah ko).
Kan I hal awk bak a simi cu; “Bible ah zumtu hawi ka ngei maw? Na zumhning bantuk hin Bible zumtu an zum maw?. Jesuh dirhmi Krihfabu zumhnak le na zumhnak ai khat maw” ti hi a si. Bia el teinak sawh sawh a si lo fawh hih. Thihnak le nunnak bia dawh a si hih. Pathian thluachuah nan cung tlung ko seh! Credit: Van Hlei Thang
Leave a Reply