Mindat-Matupi Motor Lampi Cu Mizapi Zulh Lo Ding In CDF-Mindat Nih Cathanh An Chuah! 19.7.2022 in Matupi le Mindat lampi cu mizapi nih zulh/hman lo ding in CDF-Mindat nih ralrin peknak cathanh an chuah. Cu cathanh a zul lo mi hna cu CDF-Mindat nih fak piin dantatnak kan tuah lai, thil pakhatkhat a can sual ahcun ṭuanvo kan la lai lo, tiah CDF-Mindat nih cun an thanh.
Thawngpang dang relchap. Chinmi kan caah cun lung a fak in ngaih a chia hringhran ko ee, Ralhrang Kawlralkap hna nih Falam le Hakha karlak ah a ummi Taal khua cu a dihlak ti awk in an khangh. An khangh lomi inn sarih te lawng khan a si. A dang vialte hna cu ralhrang Mifir khu hna nih an khangh dih. Hmanthlak vun langhter mi hi zoh ulaw a fiang lai.
Ralhrang kawlralkap mifir khu hna nih Taal khua an khangh hlan le an khangh hnu hmanthlak a si. Ralhrang kawlralkap hna nih Taal khua cu nikum October thla ah khangh hram an thok i, tukum July ni 9 ah an khangh tthan. Atu an khangh hnu hmanthlak zoh tikah biakinn he inn sarih lawng khangh lomi a si.
Adang Thawngpang. SAC ralkap pawl kahdohnak chungah anmah le anmah an i that. A luancia June 28 ah Myanmar-India ramri ah a ummi Lailenpi khua in Matupi lei ah a raami SAC ralkap pawl nih an sinah aa telmi raifanh in a zawmi ralkap pahnih cu an phorh hna. Lailenpi le Matupi karlak hi mawṭaw in cun nikhat chung kal a si.Asinain SAC ralkap pawl cu hriam he, ṭaung he ke in an kal caah an ruahning tluk in an lam a tluang lo.
A zawmi le hliam a pumi pawl zong an lam thluan ah an i tel.Cubantuk lam har ah sii tlamtlin lo ruangah a zawmi an hawile cu an thah hna.Lailenpi le Aayu khua karlak ah kahdohnak a um lo. Kanmah lei mi zong an um lo.Kahdohnak chungah raifanh nih a tlunhmi an hawile pahnih ruak kan hmuh. Cun, Amlai le Yankhan khua karlak kahdohnak ah hma a pumi 2 zong an thah hna” tiah thilfiang a theimi pakhat nih Mizzima ah a chim.
Cun July 6-7 kahdohnak ah a thimi ralkap ruak pawl cu inntang le lamkam ah an hlonh hna i CDF-Matupi nih an khanghpiak hna.Ahlan ahcun ralram kan kal tikah, ka nau nang cu um ko, nupi le fa he na si tiah zawn i ruah a si. Sihmanh sehlaw atu ahcun kahdohnak a um tikah zeitik dah ka zaam lai ti a bawhmi lawngte an si” tiah ralkap hlun pakhat nih Mizzima ah a chim.Ralkap a lutmi pawl zong hi fimnak ṭha tein a ngei lomi an si i a leng an um lio zongah an duh poah a ṭhudir mi an si.Ralkap chung an um tik zongah an duh poah in an um ṭhiam i ralram an kal tikah mipi innlo khangh, fir le thahnak hna an duh poah in an tuah.
Khuachung an rak luh tikah, hnahnawhnak kan pe hlah uh! Hna na kan hnawh cun nan khua kan khangh dih lai. Hnahnawhnak a kan pemi khua pawl an khanghmi a tlawm ti lo. Nan khua ah meithal kuankhat a puah cun atu bantuk in inn khanghpiak nan si lai tiah inn 3 an khangh tak” khanghpiak a tongmi khuami nih Mizzima ah a chim.Lailenpi le Matupi karlak ah SAC ralkap le CDF-Matupi cu kahdohnak voi 4 a chuak i SAC ralkap 15 an thi tiah theih a si. Credit: The Chinland Post
Leave a Reply