Tedim Khua Pawng Kahdohnak Ah SAC Ralkap 7 An Thi! Chin ramkulh, Tedim khua pawng ah nihin June 17, chunhnu suimilam 2:30 ah SAC ralkap le tualchung hriamtlai phu kar kahdohnak a chuak i, kahdohnak ah cun SAC ralkap 7 an thih lengah faak ngai in 15 hliamhma an pu, tiah Civic Defense Militia nih cathanh an chuah.
Cathanh an chuah ning ah cun Kalaymyo in Tedim lei ah a kalmi SAC ralkap motor 17 cu Tedim khuachung an luh hlan ah Civic Defense Militia le PDF Zoland phufonh nih an kah hna, tiah an langhter. Cu kahdohnak ah cun SAC ralkap lei nih hriamngan hmang in Civic Defense Militia le PDF Zoland cu an kah ve hna nain tualchung hriamtlai phu lei hliamhma tuar um lo in hnu an tolh kho ṭhan, tiah an cathanh ah an langhter chih. Credit: The Chin Post.
Thawngpang dang. Kawl ralkap hriam a bawmmi Company 6 Britain nih phihkharnak a tuah. Kawl ralkap ralruknak thilrii a bawmtu Russia company 3 le Myanmar company 3 cu Britain nih June 16 ah phihkharnak a tuah.Myanmar company a simi Synpex Shwe, Myanmar New Era Trading, Sky Aviator le Russia company a simi Ural Avia, Sins Avia Trading House le JSC Gorizont company hna cu sipuazi lei phihkharnak Britain nih a tuah.
2021 February in SAC nih hramhram in uknak a lak hnu ah, Myanmar ram ah inn le lo a zaamtak mi sing 7 deng an um tiah UN nih report an chuah hnu ni tlawmpal ah a tu bantuk in phihkharnak a chuah ṭhan hi a si.Tlangcung hmunhma ah inn le lo a ngei lomi a tam deuh cu vanlei kahdohnak ruangah a si tiah theih a si.
Myanmar New Era Trading hi Russia ser Mi-17 helicopter thilrii pawl a cawkpiaktu company a si i Sky Aviator hi SAC nih hramhram in uknak a lak hnu ah Russia le Ukraine raltuknak hriam pawl caah broker (puai-sa) a ṭuanpiaktu company a si.Synpex Shwe company nih hramhram in uknak lak a si hnu thok in Sins Avia Trading House in Kawl ralkap caah helicopter thilrii pawl a lakpiak i Singapore zongah zung an ngei.
Britain cozah nih phihkharnak a tuahmi cungah Burma Campaign Uk phu le Kawl ralkap he rian a ṭuanṭimi sipuazi rianngeitu pawl a phuangtu phu Justice for Myanmar phu nih a cohlan i phihkharnak tuah chap ding in forhfialnak zong an tuah. Credit: The Chinland Post.
Leave a Reply