SHARE CIO UH, GOOD NEWS TAKTAK THANHNAK AN TUAH CANG

Nizaan August 5, zinglei ah Hakha-Gangaw lam ah miphun ralkap CDF-Hakha le CNA nih SAC ralhrang pawl an kah hna i ralhrang pathum an thih pin ah a dang pali hliamhma an pu, tiah Hakha Campaign for Justice nih thawngpang an chuah.Rungtlang ‘266’ in a rak chuakmi squad cu CDF le CNA nih (9:40 am) ah an bawh hna i an kah hna.Ralhrang (3) an thi, hliammi (4) an si,” tiah Hakha Campaign for Justice nih an langhter.

August 5 thotho ah Rungtlang Phone Tower tung ah miphun ralkap nih SAC ralhrang pawl an vung kah a thimi le hliampu an um le um lo belte theih a si lo.Timit lei ah kan miphun ralkap hna le SAC ralhrang karlak kahdohnak pehzul in a um bang in August 2 thawk in Hakha khuachung le khua kiangkap zong ah miphun ralkap nih SAC ralhrang pawl pehzul in an kah hna.

Hakha SAC palik sakhaan, Cawbuk Gate, Hakhathar Lamton le Rungtlang Phone Tower tung tibantuk pawl an kah hna.Hakha khuachung le khua kiangkap kahdohnak ah hin SAC ralhrang lei in minung 12 hrawng an thi lai tiah an zumh i, miphun ralkap lei cu an him hna, tiah thawngpang kan theih. Credit: The Chin Journal.

Thawngpang dang. Ah Laimi Pafa Hna Nam In A Sawhtu Cu Kum 25 Thongdan An Pek: Kum 2020, March thla lio ah Laimi pafa hna nam in a sawhtu Jose Gomez III (kum 21) cu US biaceihzung nih August 4, cawn nili ah dantatnak an pekmi a thanh.Pu Bawi Cung Nung le a fale pahnih cu US ram Texas ramkulh Midland khua, Sam’s Club dawr i an kal lio ah Spanish pa Jose Gomez nih nam in a rak sawhmi hna an si.

Jose Gomez nih cun Covid zawtnak a chuahtertu Tuluk miphun ah ka ruah hna caah ka sawhmi hna a si, tiah biaceihzung ah a chim. Hi caan hi Covid zawtnak a chuahka a si caah Asian mi le a bik in Tuluk miphun cu huat le ral an ton tuk lio a si. Cucaah Pu Bawi Cung le a fapa zong hi sualnak le palhnak zeihmanh an ngei lo nain namsawh tiang an tuarnak a si.

Pu Bawi Cung Nung le a fapa nam in sawh an ton hi 2020, March 14, zanlei 7:32pm ah a si. Nam sawh an ton lecangka in an pawngkam ummi Mirang pa nih a zuanhnawh hna i amah zong hliam a tuar. An pafa in an hmai ah a sawh hna i a fapa Robert hi fak tuk in a hliamh. An pahnih in siizung ah an tlikpi colh hna. Ni zeimawzat siizung an um hnuah dam tein an chuak ṭhan.

A sawhtu Jose Gomez hi a sawh hna lio ah kum 19 a si, kumhnih a rauh hnuah biaceihzung nih kum 25 thongdan an pek hi a si. Pu Bawi Cung Nung hi Midland Chin Immanuel Baptist Church chungtel a si i, Kum 2014 ah US a phanmi an si. Pathian a duh ngaimi a si, tiah theih a si. Laitlang lei a khua cu Thantlang peng Thau khua a si nain Kalaymyo ah a ummi an si. Credit: The Chin Post.

Be the first to comment

Leave a Reply

Your email address will not be published.


*