CDM Tuah Siloin Chunglei Buainak Ruang Ah Ralkap In A Zaam Mi An Tam, Tiah Ralkap CDMer Pakhat Nih A Chim. SAC ralkap hna chung in mipi sin ah i fonh in CDM cawlcanghnak tuah siloin, a ruang tampi ruang ah SAC ralkap sinak kaltak in a zaam mi cu hlan nakin an tam, tiah SAC ralkap he naihniam in ummi hna nih an chim.
SAC ralkap nih uknak an lak hnu ah, atu bantuk in a zaam mi cu an tam i, SAC nih an kuttang ummi ralkap hna cung ah hnekchihnak an tuah ruang ah le phaisa harsat ruang ah a zaam mi an tam, tiah theih a si. SAC kuttang um ralkap hna cu a ruang tampi ruang ah an ralkap sinak cu kaltak in a thli in a zaam mi an karh ngai, tiah June thla chung ah CDM a tuahtu ralkap pakhat nih a chim.
SAC kuttang in ka chuah hlan, Meiktila ah thla 3 training kan kai lio ah, training in a zaam mi hi nitin ngawt in an rak um. CDM tuah siloin, Minung 3/4 tiin a thli in an rak zaam i kan kawl tawn hna,” tiah June thla ah khan CDM a tuahtu Myait battalion 501 in Ko Aung Min Htat nih a chim.A tlizaam mi lak ah hin ralkap sawhsawh lawng siloin ralbawi zong an i tel i, an tam ngai cang.
SAC ralkap nih nawlngeihnak an lak hnu ah ralkap pawl cu kahdohnak i kal peng a si caah re a thei tuk. Thlahlawh le eidin thilman ah harnak an tong, dinhcaan lak in mah umnak khua ah tlun a ngah lo, cucaah a zaam mi an tam ngai. Hi hnu zong ah a zaam mi an tam rih ko lai. SAC cu amah tein a tlu te ko lai, a donghnak ah cun thantar lawng a dir te lai,” tiah CDM cawlcanghnak a tuahtu Bu-kyi Zin Yaw nih a chim.
Relchap. Kachin ramkulh, Hpakant peng, Sezin khua ah KIA le SAC ralkap kar kahdohnak fak ngai a chuak i, SAC ralkap nih vanlei kahdohnak an tuah caah sualnak ngei lo tualchungmi 15 hrawng an thi, tiah bawmchantu phu nih an chim.Sezin khua ah August ni 8 in nihin August ni 12 tiang kaphnih kar kahdohnak pehtlai in a chuak i, SAC nih vanlei in an kah hna caah tualchung mi zeimawzat an an thi chap lai tiah zumh a si.
Atu tiang ah cun khuami ruak 15 lawng kan hmuh rih, tiah Sezin khuami ralzaam pakhat nih a chim. Namchan in ral kan zaam hna caah thilri zong zeihmanh kan la manh lo, thilri hru-keih ding le eidin tirawl ah bawmh kan herh tuk hringhran,” tiah a chim. Hpakant peng Sezin khua kahdohnak ah hin khuachungmi 30 in 50 kar cu an thi lai tiah zumh a si nain Phone line le internet line an phih i kan i pehtlaih khawh rih lo caah ruak kan hmuhmi 15 lawng hi kan fehter rih, tiah a chim chap.
A luancia August ni 8 ah Sezin khua um mi SAC sakhan le Sagaing ramṭhen Homalin peng Shwe Pyi Myint khua SNA sakhan cu KIA le PDF phufonh hna nih an rak kah hna hnu in SAC ralkap nih Sezin khua le a kiangkap khua pawl hna cu vanlawng in dongcat loin an kah, tiah khuami hna nih an chim. Cu kahdohnak ruangah Hpakant peng, Sezin khuami 3000 leng cu ral an zaam, tiah theih a si.Sezin khua cu Sagaing ramṭhen le Kachin ramkulh aa ton nak ah a um mi a si, Inn 600 leng a um i minung 3000 leng an um. SAC nih Inn 400 leng an khangh caah an khua ning in an zaam hna, tiah theih a si. Credit: The Chin Post.
Leave a Reply