TAMPI IN SHARE CIO USIH, THANTLANG MIPI VIALTE NIH THEI HNA USIH

Chinland Defense Force Thantlang nih fiang bak in an langhter cang. Theihcio bantukin Thantlang khuanu khuapa le ralhrang kawlralkap pawl Thantlang khua sersiam tthannak dingah tonbiaruahnak an ngei. Hi tonnak ah Thantlang pastor le khuanu khuapa aiawh in an kal hna tiah theih a si.

Ralhrang he tonnak angeimi hna zong nih an duhmi an chimmi zong fiangtein kan theih. Hi kongah CNF/CNA zong nih an theih lonak le an dirpi lonak an langhter cang mi zong kan hmuh dih. Atu ah Thantlang CDF bak nih mipi sin ah cathanh bak in an langhter. An langhtermi cu a tanglei bantuk in a si.

Thantlang Luh Tthannak Ding Konghe Pehtlaiin Cathanh. Thantlang khuachung luh tthannak ding kongah SAC ralhrang hna hruainak in tawlrelmi le tuahmi paoh cu CDF Thantlang nih kan pom lo. Atulio caan cu mipi dothlennak caan a si bantukin hi dothlennak lamthluan ah mipi thaazaang a zortertu tuahsernak paoh cu CDF Thantlang nih kan doh.

CDF Thantlang nih a i hmuitinhmi cu Ralhrang ralkap uknak a hram in bongh ding, Federal Democracy kan ngah hlan lo hi dothlennak cu tuah ding le dothlennak kan tuahnak ah mipi humhimnak papek in rianttuan ding a si. Cucaah CDF Thantlang nih Thangtlang ah umhmun khuarmi SAC ralhrang hna kan tei hna hlan lo chung le a him cang tiah thawng kan thanh hlan lo chung paoh cu Thantlang khua ah kir a si lai lo tiah an thanh.

Relchih Salai Lungthlitum nih a chim ve mi. Thantlang upa hna nih ralkap cozah an ton hna khi miphun leirawi ah kan ruah colh hna ahcun kan lungput hi kaphnih khua ruat kho lomi extremist ‘pialsual’ kan si timi fiang tein mah le mah i hngalh nak a si hnga.Thantlang an dawt tuk caah huat le thangchiat ton ding an theih tuk ko buin Thantlang khua le khuami hna caah a tha bik lai tiah an ruahmi an tuah khi a si.

Anmah pumpak ca hlawknak a um bak lo timi fiang tuk in an theih cia ko. Ruahnak le hmuh ning cu ai dang cio lai ta. Miphun zawn ruah lem loin zapi nih an uar lai timi poah aupi a hmangmi phete pawl nakin cun miphun le khuami caah a tha bik lai tiah zumhmi kha fek tein a dirpi ngammi pasaltha hna khi uar an um tuk ka ti. Credit: Salai Lungthlitum.

Be the first to comment

Leave a Reply

Your email address will not be published.


*