Tamu ah i kahnak a linsa chin lengmang cang. Ralhrang kawlralkap hna nih motor pakhat an kahthah pin ah minung pakhat zong an hliamh rih. Sagaing ramthen Tamu peng, Yanlinphaing khua le Pantha siseh Sittatkung le Maenikung ah ralhrang kawlralkap hna le mipi ralkap an i kap.
Ralhrang kawlralkap hna nih hriamnam ngan in voi 20 renglo an kah. Cun ralhrang kawlralkap hna cu TBA Biakinn ah um hmun an khua tiah thanhnak an tuah. Ralhrang kawlralkap hna nih Kalay lei in a rak rami motor pakhat zong an kah i motor mongtu pakhat a thih pin ah minung pakhat zong hliam a tuar tiah theih a si.
Zanlei ah ralhrang kawlralkap hna cu Nanmontha khua le Yanlinphaing khua inn kip ah an i chawk lut i, thilri an fir dih. Tutan ralhrang kawlralkap he aa kapmi hna cu mipi ralkap lei in Tamu PDF tatyin 3 le MFA cun PDF Tamu tatyin 2 le PDF Tatyin 4 le BSO, ABSDF le Pahkahphah hna an si tiah an chim. Kaphnih in a nunnak aliammi le hliamtuarmi zat theih asi rih lo.
Cabia dang. Kawlram mipi caah thawngpang ttha taktak a chuak. NUG cozah Union Minister for Foreign Affairs Daw Zin Mar Aung le Swedish Foreign Minister Ann Linde hna cu June ni 8 ah kawlram konghe pehtlaiin ton biaruahnak an ngei tiah NUG cozah lei nih thawngthanh nak an tuah.
Tutan ah ton biaruahnak an ngaihmi a biapi in an i ceihmi cu Kawlram ah Democracy a chuah khawhnak ding ah ram pahnih hna cawlcangh ttinak kong an i ruah khan pin ah Federal Democracy thar a dirhnak dingah ram mipi an i pek nak kong siseh, mipi bawmhnak kong.
Cu lawng siloin ralhrang kawlralkap uico rual hna thiltuah ning cang tibantuk an i ruah tiah theih a si. Hi tonnak konghe pehtlaiin Swedish Foreign Minister Ann Linde nih Kawlram mipi le Democracy ka dirpi tiah twitter ah thanhnak a tuah.
Leave a Reply