THANTLANG A KHAANGTU LE, LAIMI AA KHAN THATTU RALHRANG BAWI THEIH ASI

Chin ramkulh thahlohnak phen ah a pahnihnak rank sang bik Col. Saw Tun. Colonel Saw Tun cu Chin ramkulh ah a pahnihnak rank sang bik ralbawi a si i Chin ramkulh mipi thahnak, ruak hlohnak le raltuknak lei sualnak tampi buarnak cungah nawl ngeitu pakhat a si ve. Amah hi Chin ramkulh, Hakha peng kahdohnak a tawlreltu a si lengah Hakha khua ah hram a bunhmi LIB 266 bawi pakhat zong a si.

Colonel Saw Tun kong he pehtlai in CHRO rianngeitu pakhat nih “Amah hi hramhram in uknak lak a si hnu ah General Myo Htut Hliang he Laitlang a phanmi an si. Hakha ah hrambunh a simi LIB 266 i Chin ramkulh Strategist zong a si. Ralkap lei rank cun General Myo Htut Hlaing changtu a si.

Hakha LIB 226 nih a tlaihmi tangah thil a cangmi vialte nawlpetu le a tuahtertu a si. Inn khangh siseh, mithah le mihrem vialte zong hi amah Tactical Operation Commander a sinak in nawl a pekmi lawngte a si. Hi vialte a kan thattu, a kan nawngtu, kan inn le lo khangtu hi amah kutcung ah um kan ti khawh.

Policy cu Naypyitaw lei in a raami a si ko nain ral an tuk tik i ralram ah a cangmi le mipi sin thil an tuahmi vialte hi amah kutcung ah ummi lawngte a si” tiah The Chinland Post ah a chim.A luancia June 30 ah, Kalay in Falam lei a rak kaimi SAC ralkap pawl nih Varung (Valung) khuami Pi Tial Kap (kum 63) cu meithal in an rak kah i khuami hna nih a ruak cu July 3 lawng ah rak hmuh a si.

Cun, June 2 zongah Falam peng Hlawngzawl khuami Vum Lian Thang (a tai tang a thimi) cu SAC ralkap nih hri hren hnu ah an rak thah.Cubantuk ṭhiamṭhiam in a luancia 2021 May 9 zong ah Chin ramkulh, Hakha khua ah Pu Tler Ling le Pu Kham Bawi cu SAC ralkap nih an rak tlaih hna i an tukvelhnak hna ah an rak thi. Sihmanhsehlaw SAC nih cun Pu Tler Ling cu thi kai zawtnak in a rak thi i Pu Khamh Bawi cu cuap zawtnak in a thi tiah an rak thanh.

An ruak zong chungkhar nih an hmuh hna lo bang, Ralkap SAC nih an rak pe duh hna lo i, an rak hloh.A cunglei langhtermi mipi sualnak ngei lo thahhlohnak siseh, Thantlang inn khanghpiaknak siseh, CDF le SAC ralkap kahdohnak vialte hi Colonel Saw Tun nawlpeknak tang ah a um dihmi a si tiah theih a si. Credit: The Chinland Post.

Thawngpang dang. Bomb Puah Sualnak in Salai Bawi Za Ceu a Nunnak a Liam. Nihin July 5 ah Thantlang peng ralram hmun khat ah bomb puah sualnak in CDF-Thantlang ralkap Salai Bawi Za Ceu a nunnak a liam, tiah thawng kan theih. Bomb an tonghthammi nih minung pahnih a puah hnawh hna i Salai Bawi Za Ceu hi a hmun ah a nunnak a liam. A dang pakhat hliamhma a pu, tiah kan theih.