Thantlang peng, CNA le CDF nih an humhakmi hmunram ah ca a cawngmi siangngakchia hna caminpuai cu July 25 in 27 tiang an tuah i, tlamtling tein an lim cang, tiah thawngpang kan theih. Thantlang peng caankarlak fimcawnnak department hruainak in tuahmi caminpuai a si i, SAC ralhrang nih uknak an chuh ruang ah fimnak tlamtling in a cawng kho lomi siangngakchia pawl kha thla 6 cu ca an chimh hna hnu ah atu ah caminpuai an tuah hi a si, tiah Thantlang peng caankarlak fimcawnnak zung luzik Salai Cross Thang nih a chim.
Ralkap nih uknak an lak ruang fimnak tlamtling in a cawng kho lomi siangngakchia pawl kha thla 6 chung ca kan chimh hna i, atu ah caminpuai kan tuah hi a si. Ahlan i tang 1 a simi kha atu caminpuai an awn cun tang 2 ah kaiter an si lai,” tiah a chim.Tukum September thla in caankarlak fimcawnnak kumthar thawk a si tthan lai i May 2023 tiang, thla 9 chung cacawn a si lai.
Atu kum September thla in cacawnnak thar kan thawk tthan lai. Hmaikum May thla tiang, thla 9 chung a si lai. Siangngakchia hna ca ah cauk (Textbook) tibantuk belte hi kan chambau ngai,” tiah a chim chap.Sianginn cachimtu saya/sayamate hi CDM a tuahmi hna le volunteer in a pum aa pemi mino hna an si. Thantlang peng caankarlak fimcawnnak zung lei nih cun lahkhah pek tibantuk in an bawm kho hna lo nain mahle khua i nulepa/bu hna nih an ti khawh tawk cio in akenkip in an bawmh ve hna.
NUG zong nih siangngakchia 50 ah 150,000 MMK rate in voi khat bawmhnak a rak pek hna. Atutan Thantlang peng chung caminpuai a phimi siangngakchia hi 7,000 hrawng an si i, cu chung ah cun ralhrial (IDP) siangngakchia 3,000 hrawng an i tel hna, tiah Salai Cross Thang nih a chim. Credit: The Chin Journal.
Thawngpang dang. Tuni July ni 29 kahdohnak ralhrang kawlralkap minung 80 an thi. July ni 29 kahdohnak konghe pehtlaiin mipi ralkap hna nih thanhnak an tuahmi ah ralhrang kawlralkap minung 80 an thi. Hihi an langhtermi hi nikhat chung rampi huap kahdohnak a thimi mipi ralkap cio nih an thanhmi chirchchan in khawmhsuat mi a si.
Kahdohnak a chuahnak hmun le hma, ralhrang a thimi le mipi lei a thimi zat hna cu hitihin an si. Karen ramkulh Demoso kahdohnak ah ralhrang pahnih an thi. Mon ramkulh Ye peng kahdohnak ah ralhrang pali an thi i, Mandalay ramthen Mynchiang ah ralhrang pakhat a thi. Cun Sagaing ramthen Salyinkyi kahdohnak ah ralhrang 15 an thi.
Karen ramkulh Myawaddy peng kahdohnak ah ralhrang 12 an thi i,mipi ralkap lei in minung pahnih nih ram le miphun caah an nunnak an pek. Sagaing ramthen Kani kahdohnak ah ralhrang 25 an thi. Yangon ramthen Hlayku ah ralhrang pakhat a thi i Sagaing ramthen Monywa ah ralhrang pahnih an thi. Karen ramkulh Tan Taung Kyi kahdohnak ah ralhrang 10 an thi. Pakoko ah panga, Mynbu ah pathum an dihlak in minung 80 an thi.
Leave a Reply