Htilin Peng Palik Camp In Palik Pakhat Cu Meithal He PDF Htilin Sinah A Zam.Magway ramṭhen, Htilin peng Semintaw(ဆေးမင်တော) palik camp in palik pakhat cu a meithal he PDF Htilin sinah a lut, tiah PDF Htilin nih cathanh an chuah.Cu palik pa cu M-13 meithal zun 1, kuanbawm 2 le meithal kuan 65 he PDF Htilin sinah aa fonh, tiah theih a si.
Palik pa nih nan sinah ka rak i fonh lai, tiah a kan pehtlaih bak in a chungkhar pawl cu kan va auh hna i a himnak hmun ah kan chiah hna.Hriamnam he kan sinah a rak i fonhmi palik pa cu sing 50 lawman kan pek, tiah PDF Htilin nih cathanh an chuah. Credit: The Chin Post.
Pastor Hram Bik Lian Cabia: Jesuh nih tah ral doh lo ding a ti maw? Matt. 5:44-45 ah Jesuh nih “nan ral kha va daw hna u..” a timi hi micheu nih kan lak i ral doh cu Jesuh nawl zulh lo a si, an ti. Hihi a conext dihlak felfai tein zoh tikah le Bible dihlak nih miphun ralkap kong a chimmi zoh tikah, “ralkap he pehtlai in chimmi a si lo” timi fiang tein hmuh khawh a si.
Miphun pakhat ral kap dirhmun in hrawh dih le khangh dih cikcek a timtu ralhrang kut in miphun vengtu ralkap rian tuan le ral doh hi Jesuh zong nih a duhlonak, a khaamnak le dohnak pakhat hmanh hmuh awk a um lo. Jesuh kong kan chim hlan deuh ah, Tipilpetu Johan nih a sualnak aa ngaichih i tipil ing a duhmi ralkap pawl a sin i an rak rat lio ah khan (Luke 3:14),
Ralkap pawl nih “sual ngaihthiammi kan si cang nak langhternak caah zeidah kan tuah lai?” tiah an hal tikah Johan nihcun “midang phaisa ningcang loin va la hlah u; midang kha a dik loning in sual va puh hna hlah u” tiah a ti hna. “Ralkap rian hi a rannak in chuah tak u” a ti hna lo. Ralkap riantuan a rak thloh hna lo. Dingfel tein ralkap ttuan ding tu a rak cawnpiak hna.
Khah a si ahcun Jesuh tah? Matt. 8:10 ah Jesuh nih ralkap pa cu a zumhnak ruangah fakpi in a thangthatnak kan hmuh. Jesuh nih “hi tluk zumhnak ngan ngeimi na si caah na ralkap rian hi ngol a ti lo. Ralkap si bu in zumhnak fek tein aa tlaihmi a simi tu kha fakpi in a thanghthat ko. Cu lawng hlah, Lamkaltu Paul nih cakuat 13 a ttialmi chungah “ralkap nun hi Thlarau nun tahchunhnak” ah voitampi a lakmi kan hmuh khawh (1 Cpr. 9:7, 2 Tim. 2:3 etc.).
Zumtu caah ralkap ttuan hi Pathian huatmi thil le sual ngnapi rak si sehlaw, Paul nihhin zumtu nun cawnpiaknak thahchunhnak {possitive example} caah a rak hmang hrimhrim hnga lo. Vawlei ah dikfel tein ralkap rian a ttuanmi hna hi Thlarau nun cawnpiaknak caah zohchun awk tiang ah rak hman an simi nih a langhtermi cu Biakam Thar chan ah ralkap riantuan hi Bible nih a khaam, a doh in a hua hrimhrim lo timi fiang tein hmuh khawh a si.
Khah, kan biatlang kan kom lai. Biakam Hlun chan ah “lai nan nawng lai lo” timi nawl a rak um sihmanhsehlaw ral ram ah miphun ralkap nih a miphun venhimnak caah ral a thahmi cu nawlbia nih “lai va nawng hlah” a timi a si lo ti cu amah Pathian hrimhrim nih anmah hrawh timtu an ral {miphun dang ralkap} hna va thah dih ding in nawl a rak pekmi ah fiang tein hngalh khawh a si.
Biakam Thar zongah ralkap a ttuan cuahmah liomi hna nih sual ngaichih in Pathian an panh tikah, Johan zong siseh, Jesuh zong siseh Paul zong siseh, “Nan ralkap rian hi chuah taak u” an ti bal hna lo. A tawinak in chim ahcun, Biakam Thar cawpiaknak zong nih ralkap riantuan hi a hua, a khaam in a doh lo, timi fiang tein hmuh khawh a si.
Sihmanhsehlaw Bible cawnpiaknak in kan hmuhmi a dang pakhat cu, miphun ralkap a ttuanmi hnanih dingfel tein nun, ralkap kan si aipat tiah hrmahram in midang phaisa va chuh le sualnak a ngei lomi minung hramhram in sual va puh i va hrem hna hi kan hman awk hrimhrim a si lo, tihi Bible cawnpiaknak cu a si.”Ral doh lo ding” tihi Bible cawnpiaknak a si lo; miphun venhimnak caah ralkap tuan a duhmi nihcun dingfel, fimkhur te le dikhman tein dawtnak he an ttuan awk a si, titu hi Bible cawnpiaknak a si deuh.Lawmhnak he, Hram Bik Lian
Leave a Reply