Ralhrang dirpitu hna nih video tuksum an thlahmi cu fiangtein dotthletnak an tuah khawh cang. Ralhrang hna nih CDM bawmtu pakhat tuksum in an rak thahmi a rak si timi an theih. Ralhrang kawlralkap dirpitu hna nih dalan tiah nu pakhat cu ttihnung ngai in an thah. Hi thil atuahtu hi Dalan fimtawltu tiah an i ti nain biafiang theih a si.
Magway ramthen Myaing peng Kyian Kyi khua ah a ummi lam riantuantu Mah Nanda cu CDM palik a humhimh ruangah ralhrang kawlralkap hna nih an tlaih i ralhrang kawlralkap hnuzultu a simi Pyu Saw Htee an thahter tiah theih asi. Hi konghe pehtlaiin Myaing PDF hruaitu pakhat nih a tanglei bantukin a langhter.
Kyian Kyi khua ah a phanmi CDM Palik Zaw Lin Aung cu Mah Nanda nih a rak thuh ruangah CDM Palik cu a nunnak a rak him. Mah thil ralhrang hna nih an theih caah Mah Nanda cu an tlaih hnu ah a hngawng an tan. Khukbil in an umter i, a hnu lei in Pyu Saw Htee pakhat nih nam in a tan, Tih a nung tuk zohngam ding hmanh a si lo.
Nanda nih a thuh nawhmi CDM Palik Zaw Lin Aung hi Tayet khua palik hmun in CDM atuah mi a si i, Palik sakhan chuahtaak in a zaam hnu ah a chuahnak khua Kyian Kyi a panh. Mah lio ah Yangon in Kyian Kyi khua a rak phan mi Nanda nih humhhimnak a rak tuah i, CDM palik cu a nunnak a rak him.
Ralhrang hna nih biathatein hal loin Mah Nanda cu a thah. Hi thil a cannak hi Myaing peng le Yesakyo karlak ram a si. Mah Nanda lawng siloin midang zong ralhrang hna nih an thah mi an um rih. Video a chuak mi hi anmah ralhrang hna nih record an tuahmi a si i, hramhram in mipi hmuh dingah an thlahmi a si.
An duhmi cu midang hna nih hibantukin CDM palik siseh CDM ralkap hna bawmhnak tuah ngam ti hna hlah sehtimi an duh caah a si. Mah Nanda thattu hna cu Myiang palik sakhan ah a ummi le Kani khua, Tayet khua le Watpot khua in Pyu Saw Htee pawl hna an si. A hramthok ahcun PDF an rak puh hna nain a hnu mipi nih thilsining an theih. Hi peng ah hin Pyu Saw Htee phu 6 an dirh i hriamnam 120 hrawng an pek cang hna tiah a chim.
Leave a Reply