Kalaymyo in a rak i thawhmi ralhrang kawlralkap motor rual cu Falam le Hakha panh an ra cuahmah cang. Atu hi ralhrang hna cu Falam peng Parte khua in Falam an rak panh cuahmah. Lampi ah hriamnam ngan he hme he an puah hna. Kalaymyo in ralhrang kawlralkap motor a rami hna cu tuni ah Falam pawng an phan cang.
Tuni July nithum ah Falam pawng Parte khua in ralhrang kawlrlakap hna cu Ke in an kal hna. Lampi ah hriamnam ngan he hme he an kah cuahmah hna tiah theih a si. Zahan ah ralhrang kawlralkap hna cu Parte khua pawng Lumpang khua ah motor pali he an riak i a dang motor 20 renglo cu a hnulei Hlanzawl khua ah an um rih ti a si.
Hi konghe pehtlaiin nizan July nihnih ah Hlanzawl khuami pakhat cu ralhrang kawlralkap uico rual hna nih Lo in a rak tlun lio ah a ruang zeihmanh um lo in an kahthah tiah thawngpang theih a si. Kan Chin pasalttha mipi ralkap hna zong ralring tein um cio hna usih. Bawipa nih in kil veng hram ko hna seh.
Cabiadang. Tulio ah a lar ngaingaimi cu Thantlang khuanu khuapa nih Ralhrang sin i meeting an kai le Thantlang sersiamnak kong hi a si.Thantlang khuanu khuapa cheukhat le Pastor te hna cu Ralhrang he meeting an thu i, Thantlang sersiamnak kong an ceih tiah media tampi nih an ttial. Hi kong ah soiselnak zong a tam ngaingai i, CDF aa timi hna zong nih an lungtling lo nak an langh ter.
Hi kong ah cun mah ruahnak cio ttial a si ko lai tiah zumhnak ka ngei. Hihi ramkhel phun khat cu a si ve. A karlak ah keimah ruahnak van tenh ka duh ve mi cu, hi tonnak hi a si awk a si ko. Thantlang mipi an temtuar tuk cang. Ti le Rawl lo, Inn lo in an um a sau tuk cang. An mawh lo. Zei caan a rauh lai i zeitik ah Thantlang an kir te lai i an sersiam te lai timi hi zanmang hmanh ah ruah ngam a si ti lo.
Cu lio caan ah Thantlang upa nih ralhrang an tonmi hna hi an mawh hrimhrim lo tiah kei nih cun ka ruah. Cun CDF le CNA hna zong nih an duh lo nak le an lungtling lo nak an langh ter. an langh ter awk a si lo. Thantlang mipi chuah an fial hna hnu in fak ngaingai in i dohkahnak zong a chuak lem lo. Defense(I kham) phun in an kal pi. An mah nih cun Offense (dohtu) kan si an i ti ko nain mit nih a hmuhmi a um lo.
Hriamnam tling kan ngei lo tiah fund tu hi an kawl lengmang ko rih. Hihi zeitik ah a dih te lai i hriamnam hi zeitik ah dah tling te in an ngei lai tiah mipi nih an thei kho lo. A chim zong an duh ve fawn lo.Cu tiah mipi cu lungdongh lo awk a ttha lo. Cu caah hi tonnak hi an tuah mi a si lai tiah keimah nih cun ka ruah piak hna.
CNA le CDF zong nih Thantlang hi zeitik hmanh ah an la kho lai lo. A ruang thih an duh lo. Ralhrang thih lawng an duh. An doh hna lo ah cun zeitin dah ralhrang zong cu an tei hna lai i an thih lai. Cu caah Thantlang upa te hi mawhchiat ding an si lo. An mah CDF le CNA tu hi i mawhchiat hna sehlaw a ttha deuh. An mah santlai lo i hmuh lo in mipi santlaih loh lawng an phawt hna ah cun a si kho lai loh.
Hi ka hmun in Thantlang mipi thazaang pek kan duh hna. Ralhrang kha rak ton peng hna uh law Inn le Lo an hrawh mi zong tlawmpal cu liam hna sehlaw Thantlang cu dawh te in rak ser tthan uh. Ralhrang cu zeitik hmanh ah kan tei hna lai loh.A luan cia caan zong ah tei balmi an si lo. Ramdang zong nih a minung lu in chim lo a hriamnam hmanh in a kan bom bal lo.
Cu caah cozah cu ei awk hmanh a ngei lo mi nih tei phun a si lo. CDM zong nan rian cio ah kir hna uh. Mipi ralkap aa timi hna hi ral doh a ngam taktak an um lo. Zohdawh sawhsawh a dirmi an si. CNA belte cu tanpi an phu i upat pek an phu. Cu caah Thantlang cu Ralhrang hna he i bom in kan sersiam tthan lai. Thantlang upa te Bawipa nih na hmurka in hman ko hna seh. Credit: Global Village News.
Leave a Reply