THINPHANG TAKTAK SI CANG, MIPI SIN AH AN THANH CANG

AA nih a mipi pawl ralrinnak an tuah cang hna. Ralhrang pawl biatak tein timhlamhnak an ngaih cang caah kahdohnak fakpi a chuah khawh ruangah mipi vialte ralring tein um uh tiah AA nih thanhnak an tuah. AA le ralhrang hna cu nai ah voihnih an i kap cang. Nai an i kahnak ah ralhrang tampi an thih pin ah minung 14 an tlaih rih hna.

Cu lawng siloin ralhrang hna nih khuachung mipi hna cu an tlaih i atu hi Rakhine mipi hruaitu deuh an kawl rih hna. Cun biaceihzung ah riantuantu zong tlaih an timh rih hna i mipi hna cu hriamnam ngan in an thihpheih rih hna. Alam kip ti awk in buainak chuahter an timh ruangah tuhi kahdohnak fak a chuak kho tiah an thanh.

Nai July ni 18 an i kahnak ah ralhrang kawlralkap hriamnam tampi hna cu AA nih an lak piak hna. Atu ah hin Maung Taw peng ah thawngpang cu a dai ko nain a hnu ah zeidah a chuah te lai timi kan thei lo. Kahdohnak a linsa sual lai ti kan phan ko tiah Myawadi Administrator nih a chim. Atu hi ralhrang hna nih Maung Taw pengah ralkap thaazaang an chap chin lengmang hna tiah an langhter.

Thawngpang dang. Myanmar ram in Mizoram lei ah riithai sii phor lo ding in CNO/CNDF nih ralrinnak a thanh. Myanmar in Mizoram lei ah ritthai sii phorh/zuar lo ding in CNO/CNDF nih July 20 ah ralrinnak a thanh.Ralrin peknak cathanh a zul lomi cu CNO/CNDF nih fak piin dantat a si lai tiah a langhter.

Riithai sii Myanmar ram lei in phor i India, Mizoram chungah a zuartu Myanmar rammi, Chin miphun tampi cu Mizoram palik nih an tlaih hna tiah thawng ṭha lo taktak theih a si tiah a langhter.Ram buainak ruangah Chin miphun hna ralzaam dirhmun an phaknak le Mizoram mipi dawtnak kha caanṭha lak in mah ca miaknak, hakauhnak le mi zertiang cheukhat nih Mizoram lei ah riithai sii an phorh kha hmuh khawh a si tiah a langhter.Cubantuk thiltuahnak cungah CNO/CNDF telh in Chin mipi hna nih faak piin kan doh tiah a langhter.