TIBAK IN UICO PYU SAW HTEE NIH PDF PATHUM AN KHANGH HNA

Ralhrang kawlralkap nih mipi ralkap minung pathum an tlaih hnu ah an thah i, an khangh rih hna. Magway ramthen Yezakyo peng Sin Gyo Kyu khua pawng ah ralhrang kawlralkap hnu zul ralhrang Pyu Saw Htee hna nih mipi ralkap PDF pathum hna cu May ni 18 zanlei suimipa 11:35 ah an tlaih hna.

Cu hnu ah an thah hna i, an ruak zong mei inn an khangh tiah Taung Lat People’s Defense Froce TLF sin in theih a si. Ralhrang kawlralkap hnuzul ralhrang Pyu Saw Htee hna an tlaih thah khanghmi PDF pathum cu Saya Twin le Wana le Bay Kyaw an si hna tiah an langhter chih.

Hi konghe pehtlaiin Taung Lat People’s Defense Force TLF hna thanhnak an tuahmi cu a nunnak a liammi PDF pasaltha hna an nunnak a liammi hi kan ngaih a chiatuk hringhran. Ralhrang kawlralkap hna cu pehzulh in kan kah doh hna lai tiah an ngaihchiatnak he an langhter.

Thawngpang dang. Suu Kyi caah thawngpang tha pakhat a chuak. Ralhrang nih Aung San Suu Kyi sual an puhnak pakhat a simi Helicopter cawknak kongah taza a cuaitu hna nih tehte pakhat hmanh an ngei lo. Biaceih zung ah hi sualpuhnak cu an ceih. Asinain taza a cuaitu lei nih tehte hmuhsak ding pakhat hmanh an ngei lo. Taza a cuaitu lei Anti-Corruption commission investigation director Aung Khan cu Suu Kyi sihni hna nih helicopter cawknak konghe pehtlaihnak tehte kawlca in lehmi zong an ngaih lonak an chim.

Hi sual puhnak hi biaceih zung ah tehte he nan hmuhsak lai tiah an ti hna. Asinain zeihmanh an ngaih lo ruangah June 13 ah ceih tthan ding tiah an thanh. Sual an puhnak hi Suu Kyi nih a mah nawlngaihnak hmangin Helicopter a cawk i a hlanh hna tiah ralhrang nih sual an puh.Cun president Win Myint le Dr. Win Myat Aye zong Anti-corruption phung section 55 hmangin taza an cuai ve hna. Suu Kyi cu June ni 19 ah hin kum 77 a tlinnak ding a si.Ralhrang kawlralkap misual pawl hna nih Aung San Suu Kyi cu kum 100 chung thongthla kho dingin taza an cuai pin a tuhi theih cio bangin ralhrang nih an hren peng rih. Chungkhar hna nih hibantukin ralhrang hna nih an hrenmi ruangah UN lei ah an chim cuahmah ve tiah an langhter. TP