CNA ralbawi Pu Solomon le Chin National Army Chin National Army Center Committee chungtel Pu Robert Siang Lian Thang cu May thlachung ah Chinland chung khuate hna ah kal in khuanu khuapa le CDF hruaitu hna he tonnak an ngei i, thazaang i peknak zong an ngei kho hna.
An khualtlawnnak ah an chim ruahmi hna cu tulio kan ramkhel thlihran ning siseh ralram lei sining, ukhruainak lei siseh culawng siloin Chin ramkomh dirhnak, Federal sernak kong hna ceihhmainak zong an ngei tiah theih a si.
Thawngpang dang. Tuksapur in ralhrang kawlralkap nih khuami minung panga an thah hna i, an ruak cu inn he an khangh tti hna. Magway ramtthen Gangaw peng Nyaung Le khua ah ralhrang kawlralkap hna cu June nithum zanlei ah an lut hna i, mipi umnak inn pawl an khangh hna.
Ralhrang kawlralkap misual pawl nih inn an khanghmi pakhat ah ui hrennak hri in a kut an leh hnu ah mei inn an khanghmi ruak pakhat cu khuami hna nih an hmuh tiah theih a si. Cu lawng siloin Nyaung Le khua tlanglong lam pawng inn pakhat zong inn he an khanghmi ruak an hmuh rih.
An ruak zoh tikah an hngawng ah hri in an khih hna i an thah hna, cu lawng siloin an ruak cu inn he hmun khat ah an khangh mi ruak pali an hmuh. Ruak an khanghmi hna hi a dihlak in ruak panga an si. Atu tiangah mizei an si timi theih an si rih lo.
Leave a Reply