Ṭeek Tlak Caan Ih Thlun Tengteng Ṭulmi Pawl.Fur caan a thlen tin tein kum tin deuh thaw in ṭeek ih tlakthat a tongtu pahnihkhat an um ringring. Ṭeek ih dennak le tlaknak ihsin kan kilhimawk theinak dingah ziang tin kan um ding ti kan zoh tlang hnik pei. Inn Lengih Um Tikah.
Pakhatnak. A zamrang thei bik in inn sungah lut vurvo aw. Pahnihnak. Ṭeek ih tlak/den ngah theimi thir tivek thilri pawl keng hlah. Pathumnak. Thingkung hnuai asilole letṭhik meisa ṭhuam hnuai tivek ah um hlah.Palinak. Na kiangkap ih ummi lakah a niamnak bik hmun ah um aw.
Panganak. Tili hmun, tiva tivek sungih na um asile suak lohli awla a zamrang thei bik in hmun dang ah feh aw.Paruknak. Inn leng tivek ah miburpi tokhawm/umkhawm lo ding.Pasarihnak. Loo, bualrawn tivek ah mahte lawng um lo ding. Pariatnak. Na sam an tung, khawsik hmul puak vekih na um pang asile na kut paphnih kha na khuk parah ret in, na ruangpum kha a kual in um aw.
Pakuanak. Tiva ih nga na hawl laifang le tii na leuh/bual laifang a si ahcun a zamrang thei bik in tikap ah kai lohli aw.Pahranak. Ruahpi sur zik le sur laifang tivek ah lek hlah. Inn Sungih Um Tikah. Pakhatnak. Inn sung laifangah um ding. Tidai pipe le pakan kholhnak kiang tivek ah um lo ding.
Pahnihnak. Tukverh kiangah um lo in a hlatnak hmun ah um ding.Pathumnak. Phone na biak rero lai a si hmanah colh tengteng ding. Ṭeek tlak laifang ah phone biak lo ding. Palinak. TV, Radio, letṭhik rawlsuannak bungrua/beel, hnipuan rawtnak le computer tivek hmang lo ding. Meisa hri pawl phoih thluh ding.
Panganak. Nimthla a kau laifangah inn sungih thir tivek, ṭeek ih tlak ngah theimi thilri pawl tham lo ding. Inn sungah tii kholh lo ding. Paruknak. Inn luanglu tlunah ṭeek hrial theinak thilri ret ding.Pasarihnak. Ṭeek tlak ṭheh hnu a mal bik minit 30 a rei hnu lawngah inn lengah vaaksuak aw. Letṭhik meisa a mit asile daatmei asilole meifar tivek vaang aw.
Mawṭaw Mawng Tikah. Pakhatnak. Ṭeek tlak laifangah mawṭaw kha cak tuk in mawng hrimhrim hlah. Pahnihnak. A cang thei asile lamzin kapah cawl lawk aw; mawṭaw sungah um aw. Pathumnak. Zin kapih mawṭaw na colh tikah signal mei kha vaangter aw. Palinak. Thingkung saang zetzet hnuai tivek ah colh lo ding. Panganak. Tii a tam zetmi lamzin parah mawṭaw mawng lo ding. Hram: Myanmar Alinn, April 20, 2015; pg. C. Lairawn Meifar. Hminsin: 2018 kum ih cahram 309 nak ah ka rak post dahmi si. Theih tul zetmi si ruangah ka post lehnak si. Credit: CTM
Leave a Reply