Falam pengah ralhrang kawlralkap Helicopter voiruk tuni ah a ttum. Tuni August ni 11 zingka suimilam pasarih in Falam khuapi le Falam peng Rihkhawdar ah ralhrang kawlralkap helicopter voiruk a ttum. Khuami nih an chimmi cu zanlei suimilam pali tiang ah ralhrang helicopter hi voiruk a rak ttum tiah thanhnak an tuah.
Zingka suimilam pasarih in chun tiangah Ralhrang kawlralkap helicopter cu Rihkhawdar ah voithum a rak ttum i, zanlei suimilam pathum in Falam khuapi Vankau tlangah Helicopter voithum a rak ttum tiah theih a si. Nizan August ni 10 zingka suimilam pahnih in pasarih tiang India le kawlram ramri Rihkhawdar ah i kahnk chuak.
Ralhrang kawlralkap hna hi mipi ralkap hna nih an va kah hna. Hi kahdohnak ah ralhrang kawlralkap bawi pakhat telh in minung panga an thi i, minung pali CDM an tuah. I kahdohnak thawngpang a daih tlawmpal ah ralhrang kawlralkap raltuknak vanlong zong voili Rihkhawdar le Tio cungah aa hel. Asinain bomb cu a thla lo tiah theih a si.
Tuni ralhrang helicopter a rak phanmi konghe pehtlaiin khuami hna nih an zumhning ahcun nizan i ralhrang kawlralkap a thimi pawl ruak an rak lak pah hna i, cu ahcun ralhrang kawlralkap thaazaang zong an chap lai tiah zumh a si. Tio tlangah a ummi ralhrang kawlralkap hna cu mipi ralkap hna nih August nihnih in ni 7 tiang drone in an kah hna tiah theih a si.
Thawngpang dang. Magway ramṭhen, Myotit peng Kani khua ah August 9, zinglei ah khan SAC ralkap le Beikthano hmunram tualchung hriamtlai phu kar i kahdohnak ah khuami pakhat le PDF chungtel 6 nunnak a liam, tiah Beikthano PDF nih an thanh. Beikthano PDF chungtel 6 cu Kani khua an um lio an i dornak inn ah, SAC ralkap nih luhhnawh in an kahdoh hna caah tualchung hriamthlai phu chungtel 6 an nunnak a liam hi a si, tiah Beikthano PDF in ṭuanvo ngeitu nih nihin August 11 ah RFA ah a chim.
PDF hna cu inn chung an um lio ah, SAC ralkap tam ngai nih luhhnawh in an kah hna, PDF lei zong nih an i kenmi M4 meithal pakhat le a tawimi meithal pakhat he an kah ve ko hna nain, minung thazaang le hriam thazaang aa thlau tuk caah PDF 6 le tlun inn a onhtu inn ngeitu pakhat hna cu an nunnak a liam,” tiah ṭuanvo ngeitu nih cun a chim.SAC ralkap lei cu motor 4 he minung thazaang 30 leng an si. PDF lei kahnak in SAC ralkap bo 3 le ralkap dang pakhat an thi, tiah tualchung mi nih an chim.
Leave a Reply