SAC Ralkap Nih Hakha Le Nipi Karah Nu Pakhat An Kah Thah!Nihin August 12 ah Hakha le Nipi kar lampi ah khualtlawng motor pakhat cu SAC ralkap an kah caah motor chung ummi nu pakhat a nunnak a liam, tiah theih a si.Min langhter a duh lomi pakhat nih, “Khualtlawng motor cu kaphnih an i kahnak karlak ah an um.
SAC ralkap nih naih tuk in motor cu an kah caah nu pakhat a nunak a liam. Motor thlalang zong a kuai dih,” tiah The Chin Post ah a chim.Khualtlawng mi pakhat nih cun, “Nihin August zinglei ah khualtlawn ding in kan i thawh, ralkap le kan Chin ralkap an i kah caah kal rih hlah u an kan ti. Kahdohnak a daih hnu ah kan lan,” tiah The Chin Post ah a chim ve.
Nihin August 12 chun hnu ah Timit lei zong in bomb thawng lawngte a thang. Zanlei sang ah Hakha thar hrawng in bomb thawng cu voi 5 leng a thang, Hakha a tlerh dih,” tiah Hakha ummi pakhat nih The Chin Post ah a chim. Credit: The Chin Post.
Nihin August 12, zinglei sml. 8:00 hrawng ah Hakha-Gangaw lam ah khualtlawng motor (Pajero) meithal in kah a ton caah nutung no pakhat a nunnak a liam, tiah ruak a bultawltu Hakha biaknak lei upa hna sin in thawngpang kan theih. Nihin zinglei suimilam pariat hrawng ah khan hi thil hi a cang. Hakha-Gangaw lam mengtung 4 zawn hrawng khan a si.
Annih hi hmai bik ah a kalmi motor an si. Meithal kah thawng an theih in an dir i an kun dih hna. Fa pakhat a ngeimi Pi Siang Hnem Cer hi meithal kuan nih a khen caah a nunnak a liam,” tiah ttuanvo ngeitu upa pakhat nih The Chin Journal ah a chim.
Pi Siang Hnem Cer (kum 22) hi fa pakhat a ngeimi nutung no a si i, Falam peng Ral-lang khuami a si. Meithal kuan nih a lu ah a khen i a hmun ah a nunnak a liam colh.Anih hi a lu ah meithal kuan nih a khen i a hmun ah a nunnak a liam. Cun, a dang pa pakhat Kap Tin Hre hi a phei ah an khen i a hma a fak ngai. Cun, Pi Siang Hnem Cer i a vapa Paul Lian hi a liang ah hliamhma fak lo a pu ve,” tiah a cunglei upa nih a chim chap.
Meithal puah thawng a than lecangka in khualtlawng pawl an kum dih hna i, khoika lei in a rami meithal kuan nih a khen hna timi zong an fiang kho lo. Pi Siang Hnem Cer a rauk cu Falam peng an khua lei ah an tlunpi, tiah thawngpang kan theih. Credit: The Chin Journal.
Leave a Reply