Hakha Khuachung Hmun 2 ah CDF-Hakha nih SAC an Kah Hna. Nihin August 2, zaanlei ah Hakha khuachung hmun hnih ah CDF-Hakha nih SAC ralhrang pawl an kah hna, tiah thawngpang kan theih.Zaanlei sml. 3:20 hrawng ah Vom Tu Maung cerhtual pawng i SAC palik sakhaan cu CDF-Hakha nih an kah hna i minute 5 chung hrawng kap hnih i kahnak a chuak.
Khuami pakhat nih, “SAC ralhrang pawl nih an kahmi hna i kan naule ralkap hmu loin kah thlorh in an kahmi a lo. Mi umnak inn lei ah pei an rak kah ko cu. Inn cheukhat zong an khen i a rawkralmi a um pah,” tiah a chim.Palik sakhaan kah an ton hnu minute tlawmpalte a rauh ah Hakhathar lomton (6-Lansone) ah hmun a khuarmi SAC ralhrang pawl cu CDF-Hakha nih pehzul in an kah hna.
Nihin zaanlei Hakha khuachung kahdohnak ah CDF-Hakha lei in hliampu le a nunnak a liammi an um lo. SAC ralhrang lei belte an sining theih a si lo.Hakha-Thantlang karlak Timit lei zong ah SAC ralhrang nih thazaang tampi in kan miphun ralkap pawl an kal hnawh hna i nihin zong ah kahdohnak a chuak. Credit: The Chin Journal.
Cabia dang. KHUA HNGAK HNA NIH TOIDORNAK THUAMTU I THUAM CANG HNA U SIH.Rai le Ral le Mangțaam ruangah, kan Miphun nih, thih le lohnak, sunghzatlaknak, harsatnak le ngaihchiat-țahnak faak, kan ton cuahmah hna!Rai cu a hun i ning deuh nain, Ral le Mangțaam ruangah unau tampi hna nih, “BAWIPA pekmi, Chinram te cu,” zeiti a va um te lai? ruat kho ti loin, hnu chit in aho kham khawh loin, a bubu in an kan zaam taak i an kan chuah taak cuahmah!
Raldohnak hi a faak chin cuahmah i, thilman zong a kai chin lengmang ve! A derthawm tukmi kan nunnak le kan hngahmi khua hna hi, thaizing ah a rawk kho le a kaang kho an si hna i, kan dawt tukmi kan tlangval/ngaknu țhațha hna le kan unau hna nunnak a sung kho kan si ko lio hna ahhin, Isaiah 22:12-13 bantuk in, “Zei hngal lo bantuk le Nuamsul inpei” kan nun ko rih hna hi!
Isaiah 22:12-13, “BAWIPA Ralkapbu PATHIAN nih cun, Țah awk le mitthli tlak awk le nan lu i kongh awk le buri i aih awkah an auh hna. Sihmanhsehlaw a nih salam men in nan ni i puai tu nan tuah. Tuu le caw kha nan that i zu nan ding,” a ti. Khua hngak, Ram hngaktu hna kan umtu ning le kan cawl kan cangh ning hna hi țha tein ruat țhan tuah hmanh u.
Kan thuam țha bikbik i thuamin puai tuah le i pumhnak tuah te hna, online/Facebook i post te hna, tangka miak le a karh rumro dawi te hna le um sawhsawh le tlonlen sawhsawh men caan a si lo. Zarhpi ni pumh hmanhah kan thuam țha bikbik i chiah rih in, toidornak thuamte tu he, BAWIPA Zaangfahnak tam chinchin in kan hmuhnak hnga, Thlacamnak le Nawlpatnak lei tuin kan i pumhnak hna hi kan hman hna awk a si.
BAWIPA Sunparnak ca ah kan hngah mi, BAWIPA pekmi Khua le Ram le BAWIPA thimmi kan Miphun caah tuah khawhmi țha tuk kan ngeihmi cu; BAWIPA Hmai i toidor te i khuasak le Thlacam lengmang le rawl ulh lengmang hi a si. Nihin i Rai le Ral le Mangțaam harsatnak kan tonmi fahnak hna hi a lakin tuar men loin, kan Miphun nun țhannak le sersiamnak ah hmangin, kan thlarau sersiamnak le nun țhannak le lungput i țhumh i remhnak lei in,
Thluachuah i co pi hna u sihlaw, Vawlei sunparnak thil paohpaoh chia rih in, BAWIPA Hmaiah tangdornak thuamtu i thuam cang hna u sih. Cuticun, BAWIPA thilti khawhnak le a țhawnnak khuaruahhar cu kan hmuh lai.BAWIPA PATHIAN a Vel cu tam chinchin in, a thimmi Miphun cung ah le pumpak cio nan cung ah um ko sehlaw, a lamkip in inhuppheng ko hna seh.KHRIH Lamkaltu Tluang Lian (Martar)
Leave a Reply