UKRAINE PRESIDENT NIH ANRAM ANVEN NAK NI 100 TLING I BIA CHIM MI

Ukraine cu Russia kutin a him khawh nakhnga runvennak caah tiin kahdohnak kan tuahnak cu ni 100 a hung tling cang, tiah Ukraine President Volodymyr Zelenskyy nih a chim. Ukraine cu Russia nih luhhnawh in February 26 ah khan kahdohnak a rak tuah, nihin cawn ninga ni in cun ni 100 tlinnak a si cang, tiah Zelensky nih nizan ah a chim.

President zung ah ṭuanvo ngeitu lutlai hna le cozah rianṭuannak ah ṭuanvo ngeitu hna he President Volodymyr Zelensky nih biachimnak a ngeih lio ah kan ram runvennak caah ral kan dohnak ah hin kan ralkap thazaang zong a hung ṭhawng deuh, a hung fek deuh lehlam tiah a chim.Ukraine ralkap le Ukraine mizapi he lungrual tein kan ram runvennak ca ah ral kan dohnak cu ni 100 a hung tlin bantuk in teinak kan hmuh hrimhrim lai tiah President nih a chim.

President Zelenskyy nih cun Russia ralkap nih Ukraine ramchung 20% tluk cu an laak cang tiah cawn nili ni ah khan a rak chim i, Kilometer 1000 leng chung ah cun pehzulh in kahdohnak a chuak peng, Russia ralkap nih an laakmi kan ram hi Netherlands ram nak hmanh in a kau deuh, tiah Luxembourg Parliament ah online in a rak chim.Crd;The Chin post

Thawng dang. Chin ramkulh, Paletwa peng, Abaungthar khua pawng, May 26 ah a chuakmi AA le SAC ralkap karlak kahdohnak he pehtlai in khuabawi le khuami 2 SAC ralkap nih an tlaih hna tiah khuami hna nih RFA ah an chim.Kahdohnak a chuah ni ah khuabawi U Kya Htun Aung tlaih a ton bantuk in khuami U Chit San le U Kya Aung zong ni 2 a rauh hnu ah tlaih an tong ve tiah RFA nih a langhter.

Ralkap pawl khuachung an rak lut i khuami 5 an tlaih hna. Cu chung in 2 cu an rak luat ṭhan. Pathum cu a tutiang tlaih tlaih an si rih ko. Khoika dah an chiah hna i zeiruangdah a tutiang an thlah rih hna lo timi zong a fiang in theih a si rih lo. An chungkhar pawl thinphang in an um ko.

A luancia May 26 ah Abaungthar khua in 2 furlong aa hlatnak ah AA le SAC ralkap karlak ah kahdohnak a fak tiah theih a si. SAC biachimnak nawl ngeitu nih cun kahdohnak ruangah ralkap a thimi cheukhat an um i AA zong ralrinnak kan pek tiah RFA ah a chim.

Kahdoh a chuahnak a pawngkam hmunhma ah kaphnih nih hmunhma an lak caah khuami hna thinphang in an um i leng an chuak ngam lo tiah theih a si. Rakhine ram zongah ralkap le AA karlak ah entainak a fak tuk cang i kahdohnak fak tuk in a chuak sual lai tiah khuami hna thinphang in an um.