Tuzing August ni 12 Hakha Rungtlang sakhan pawng i kahnak thawngpang update a vun tuah mi a si. Tuni zingka ah Ralhrang kawlralkap uico rual hna le kan ralkap hna cu Hakha Rungtlang ralhrang sakhan le Nipi khua karlak ah kahdohnak a chuak. I kahdohnak ah kan ralkap pasalttha an him dih tiah theih a si.
Ralhrang kawlralkap lei in minung pakhat cu hmun cia ah a thi. Culawng siloin ralhrang kawlralkap lei in hliam a tuarmi minung tam ngai an um nain a zat a fiang rih lo tiah a langhter. Tuzing zongah Hakha lonh Timit lei ah ralhrang kawlralkap le kan ralkap hna an i kap rih tiah theih a si.
Relchap Thawngpang dang. Ralhrang nih khuami pakhat an thah pin ah minung pahra hrawng an tlaih rih hna. Nizan August ni 11 zan ah ralhrang kawlralkap hna cu Magway ramthen Pauh peng, Shya Shay Chyat khua ah an lut i, sualnak ngeilo khuami pakhat an thah pin ah midang minung pahra hrawng zong an tlaih rih hna tiah an thanh.
Culawng siloin khua zong ralhrang kawlralkap hna nih an khangh tiah khuami hna nih an chim chih. Hi konghe pehtlaiin khuami pakhat nih a chimmi cu khuachung ah ralhrang an rak lut i, khua an khangh. Cun a zaam lomi khuami hna zong an tlaih hna i an tlaihmi hna hi minung pahra hrawng cu an si lai.
Khuami a zaammi hna zong ralhrang kawlralkap hna nih an kawl cuahmah rih hna. Kum 40 hrawnghrang a simi pa pakhat zong an thah tiah a chim chap. Hi konghe pehtlaiin ralhrang kawlralkap hna nih August ni hra ah khan Ye Thyat khua zong a dihlak in an khangh cang. Khua an khangh hnu ah a tu khua ah hin an lut thil an tuah hi a si.
Leave a Reply