Falam peng Taal khua inn kaangmi zat a fiang cang. Ralhrang nih Taal khua ah inn 25 an khangh. Inn ruk te lawng a kaang lomi a si. Ralhrang kawlralkap nih Falam le Hakha kar ah a ummi Taal khua cu July ni 9 zing in khangh hram an thok. An khanghmi hi inn 25 a si cang tiah khuami nih an chim.
I kahdohnak ah ralhrang tamtuk an thi i an ruak an lak thlu manh lomi zong an um pin ah hliamtuar zong tam an um caah an thinhung in an khangh tiah an chim. Atu hi inn a kaang lomi cu 6 te lawng asi tiah a chim. Taal khua hi kahdohnak a chuah ngainak hmun a si i, khuachung ah a ummi satil vialte ralhrang nih an thah dih hna i pakhat hmanh a um lo tiah theih a si.
Nikum June le July thlathok in Vok le Ar siseh a dang zong an dih dih. Ralhrang kawlralkap an tlunlei le an kal lei he cun kahdohnak hi voi riat a si cang. Nikum October thlachung kha kan tuar bik caan a si. Kahdohnak a tam caah khua pakhat ah minung zahnih a zarhzarh in an um, Khuachung ah zeihmanh a tang lo tiah a chim.
A voikhatnak Taal khua lonh i kahdohnak ah ralhrang kawlralkap hi minung zakhat hrawng an si. Asinain kahdohnak a tamtuk caah an kir. Avoihnihnak Taal khua ah zarh khat an riak i fak piin kahdohnak a chuak i an celh lo ruangah ram lak ah an kal. Lampi zulh in kal ngam a si lo caah voihnih ram tangin Hakha an phan tiah theih a si.
Falam le Hakha karlak ah a ummi Taal khua hi a dihlak Pastor le cozah riantuantu hna in telh loin inn 36 a um. Nikum ah khan ralhrang kawlralkap nih inn 11 an khangh dih cang. Tutan ah an khangh tthan i, inn 6 te lawng atu hi a tang cang tiah khuami pakhat nih a chim.
Atu zong ralhrang kawlralkap le mipi ralkap hna cu Tlaangzaar pawng ah an i kah cuahmah lio a si. Chin ralkap vialte hna caah thlacamnak in bawmcio hna usih. Atu lampi mipi ralkap hna nih an kaarceh mi ralhrang kawlralkap hna hi minung zeizat ciah dah an si timi theih an si lo. Atu tiangah minung 20 hrawng an thi cang tiah theih a si.
Leave a Reply