Hriamtlaih dothlennak hi SAC nih a hrawk kho lai lo tiah US State Counselor nih a chim. SAC phu nih hriamtlaih in dothlennak a tuahtu phu pawl a hrawk kho bal hna lai lo, Democracy lam cungah a kal ṭhan awk a si tiah U.S Ambassador pakhat nih a chimnak kong June 13 Reuters ah an langhter.
SAC phu hi sunghnak nganpi a tong, a ngeihmi hmunhma pawl zong a sung dih, ṭha tein kan ruah a si ahcun a dohtu phu pawl hi a tei kho hna lai lo tiah U.S State Department ruahnak cheutu Derek Chollet nih Thai ram, Bangkok khua thawnglatu pawl sin ah June 11 ah a chim tiah Reuters ah langhter a si.
SAC cu ramdang lawng si loin ramchung zongah pheu a tong i, a lileng, kahdohnak dihter in Democracy lam cungah a kal ṭhan ding a si cang tiah Derek Chollet nih a chim. Myanmar ram buainak tawlrel khawhnak ding caah China hi a biapi mi ah a tel ve tiah U.S Ambassador Derek Chollet nih a chim.
Relchih. Wallay palik sakhaan KNDO phufonh nih an lak. Karen ram, Myawady peng, Wallaymyaing peng cheu ah a ummi SAC kuttang Palik sakhaan cu Karen National Defense Organization (KNDO) phufonh hna nih June 13 zinglei ah an kah hna i sakhaan bawi telh in palik 4 a nung in tlaih an si, PDF kan khamh khawh hna tiah KNDO phu captain Salung kuttang hriamtlai 1 sin in theih a si. Tuzing ah palik sakhaan kan lak khawh. Mei in kan khangh. Palik 4 kan tlaih khawh hna. PDF 9 kan khamh khawh hna.
VENOM pawl a ṭha bik in an i zuam. An mah tein an kherhhlai man a phu” tiah Captain Salung kuttang hriamtlai 1 nih a facebook cahmai ah a tar.Palik sakhaan kahdohnak chungah 60MM 1 le hriamhme 3 le zen cheukhat chuh khawh an si tiah theih a si.Wallay sakhaan hi Captain Salung hruaimi KNDO commando battalion le PDF hna fonh in an kahmi hna a si i kahdohnak kong le hriam chuhmi kong he pehtlai in phungning tein thanhmi a um rih lo. Credit: The Chinland Post.
Leave a Reply