ZRA CU AN SAWM KO HNA IN AN CHUAK KHO LO

ZRA cu kan sawm ko hna nain an i tel kho lo tiah tuanvo ngeitu pakhat nih a chim. Tedim peng chungah hriamtlai bu tam ngai an um hna. Hriamtlai hna cu hmunkhat ah tonbiaruahnak an ngei tiah theih a si. Tedim peng chungah hriamtlai hi phu 8 an um tiah theih a si. Cu hna cu CDF Hualngoram le CDF Tonzang cun CDM Siyin le LDF New Haimual le PDA, PDF Zoland, Zogam Army le Zomi PDF pawl an si.

Hriamtlai phu riat hna cu suimilam pathum chung tonbiaruahnak an ngei hna. An ceihkhan ah biapi in an i ruahmi cu pakhat le pakhat i theihthiam ding, Khat le khat buainak um lo ding le pakhat le pakhat i kah lo ding. Cun pehtlaihnak tha ngaih ding timi pawl i ruah ttinak an ngei hna.

Hi konghe pehtlaiin tuanvo ngeitu pakhat nih a chimmi cu tutan kan i ton biaruahnak ah ZRA cu an i tel lo. I tel dingin kan sawm ko hna nain tutan cu an i relrem lo. Hmailei ahcun ZRA zong ton biaruahnak ah i tel dingin kan sawm ko rih hna lai tiah a chim.

Thawngpang dang. Thlichia hrang nih Thingkung a khiah i, cu a kiakmi Thing nih ralzam minung pakhat a tlak caah a nunnak liam. Nizan May ni 17 zanlei suimilam pahnih le cheu hrawngah Kalay peng Natchaung ralzam hna umnak camp cu thlichia nih fak ngaiin a hrawh. Ralzam an umnak buuk cu thingkiak nih a tlak i a chungah a ummi kum 14 hngakchia pakhat a thah.

Hi konghe pehtlaiin khuami pakhat nih a chimmi cu hngakchia nute hi ralzam camp ah a ummi a si. An umnak buk hnulei ah thingkung nganpi a um. Cu thinkung cu a tlu i an umnak buk a nanh caah hngakchia nute a nunnak liam tiah a chim. Buk chung ah hin a u Nu zong a um.

Thingkung nih hin a U nu zong a nanh ko nain a nih cu a nunnak liam lo. Hliam tu a tuar ko nain a nunnak caah tihnung cu a si lo tiah a chim. Ralzam camp ah hin tuamhlawmtu an um konak thilri an neih lo caah a nunnak kan chanh manh lo tiah a chim. Cun sizung kalpinak ding motor zong a um lo caah Ma Yu Hlaing THin cu a nunnak a liam tiah a chim chih.