ZUAL KO. CDF PASALTTHA NIH A NUNNAK A PEK TTHAN EE. RIP

Ngaihchiatnak Thawng. Ram le Miphun caah CDF ralkap pakhat nih a nunnak a pek tthan e. Tuni April 22 ah ralhrang kawlralkap le CDF Kanpetlet i kahdohnak ah CDF Kanpetlet chungin pasalttha Salai Thang Awn nih ram le miphun caah a nunnak a pek tiah thanhnak an tuah. Tuni kahdohnak ah ralhrang kawlralkap lei a nunnak a liammi zat theih khawh asi rih lo. Miphun le ram caah a nunnak apetu Salai Thang Awn upatnak kan in pek tiah an langhter.

Tuni April Ni 22 thiamthiam ah CDF Matupi le ralhrang kawlralkap zong faktuk in kahdohnak a chuak. Hi konghe pehtlaiin CDF Matupi nih thanhnak an tuah mi cu Tuni April ni 22 chun suimilam pahnih le sawmli ah Matupi in menghnih a hlatnak hmun ah ralhrang kawlrlakap le CDF matupi an i kap. Kahdohnak ah ralhrang a thimi zat theih a si lo. Zanlei pahnih le cheu hrawng zongah an i kap rih.

Zanlei suimilam pahnih le cheu hrawng i kahdohnak ralhrang lei in minung panga an thi. Hmunhnih i kahdohnak ah CDF lei cu kan him. Ralhrang nih CDF Matupi umnak ah thaazaang an chap caah kahdohnak a zual chinchin lai. Cucaah thla kan campiak peng uh tiah kan sawm hna tiah CDF Matupi nih an langhter.

Thawngpang dang. Matupi ah a ummi ralhrang kawlralkap pahnih an hriamnam he an zaam. Chinram kulh Matupi khuapi i Myanmar Sipuazi Bank zohkhanhtu ralhrang pahnih hna cu Nizan April 21 ah an hriamnam tlamtlin he an zaam caah ralhrang nih biatak tein an kawl cuahmah hna tiah thanhnak an tuah.

Hi konghe pehtlaiin Matupi khuami pakhat nih a chimmi cu tuni cu Matupi Gate ah ralhrang kawlralkap aa chokvak mi an tam taktak. Kawlmi an ngei. Thawngpang kan theihmi cu Bank zohkhanhtu ralhrang pahnih hna cu an hriamnam he an zam caah biatak tein an kawl hna tiah a chim.

Tutiang rih ahcun ralhrang kawlralkap a zaammi pahnih hna cu an tlai rih hna lo. Asinain khuachung ah a ummi tthenkhat an tlaih hna i, biahalnak an tuah hna lai dah. Ralhrang kawlralkap nih Matupi peng chung hrimhrim ah ralhrang thaazaang an chap chin lengmang tiah a chim.