ZUAL KO. RALHRANG NIH A FAPA ZAKAA AH AN THAH EE

A poitaktak. Ralhrang nih a fapa tlaih ding an hmuh lo ruangah a Pa an tlaih i nithum a rauh hnu ah a nunnak a liam tiah theih a si. Kalaymyo ah ralhrang nih an tlaih dingmi an hmuh lo ruangah hringtu a Pa an tlaih i nithum hnu ah a nunnak a liam tiah khuachung mi hna nih an langhter.

Ralhrang kawlralkap nih Pu Maung Toe fapa cu tlaih dingin June ni 24 ah an umnak Aung Tatsa sang i, an inn ah an va kal hnawh. Asinain a rak um lo ruangah hringtu a Pa cu an tlaih tiah theih a si. Mah ni ah hin a fapa tlaih dingin an ra. An hmuh lo caah a Pa an tlaih mi a si.

Zeiruang ah dah ralhrang hna nih an tlaih timi hi kanmah zong nih fiangtein kan thei lo tiah khuami pakhat nih a chim. An tlaih mi Pu Maung Toe hi kum 40 hrawnghrang minung a si i, June ni 27 ah a nunnak a liam. Ruak rak la uh tiah ralhrang kawlralkap hna nih chungkhat pawl an chimh hna.

Ralhrang kawlralkap nih nawlngaihnak an lak hnu ah Kalaymyo mipi an tlaihmi chungin a nunnnak a liammi hi minung pasarih an si cang. Ralhrang sakhan ah a thimi hi minung paruk an si hna. Rampi huap in ralhrang kut in mipi a nunnak a liammi hi minung 2032 an si cang tiah theih a si.

Thawngpang dang. CDF-Mindat Le SAC ralkap Kahdohnak Ah SAC Ralkap 4 an thi, CDF-Mindat In Ralkap Pakhat Nunnak A Liam! Nihin June 29, zaanlei suimilam 2:00 ah CDF-Mindat le SAC ralkap kar kahdohnak a chuak i, cu kahdohnak ah cun SAC ralkap pakhat a thih lengah ralkap zeimawzat hliamhma an tuar.

Zaanlei suimilam 3:00 ah kaphnih kahdohnak a chuak ṭhan i SAC ralkap lei in minung 3 an thi chap, hliam tuar zong an um tiah theih a si.CDF-Mindat ralkao pakhat cu hliamhma pu in, hnu an tolh lio lampi ah a nunnak a liam. Pakhat zong hliamhma a tuar i, a hliamhma kong ah thin phan ding cu a um lo tiah nawlngeitu pakhat nih a chim.

Hṭilin peng Aungyua(အောင်းရွာ) khua in a chuakmi SAC ralkap hna cu Mindat peng Palungtui(ပလုံတွီ) khua ah lut in umhmun an khuar tiah theih a si. Mindat pengchung ah faak ngai in kahdohnak chuak kho a si caah, an herhmi bawmhchanhnak pe cio ding in CDF-Mindat nih bawmhhalnak cathanh an chuah. Credit: The Chin Post.

Be the first to comment

Leave a Reply

Your email address will not be published.


*