Gangaw peng kahdohnak ah mipi ralkap minung pasarih an nunnak a liam pin ah hriamnam tampi zong an lak tiah theih a si. Nizan May Ni 26 Gankaw peng ah ralhrang kawlralkap uico hna nih mipi ralkap hna an um nak sakhan cu helicopter in an kah hna. Hi kahdohnak mipi ralkap minung 7 an thi i, hriamnam zong an lak tiah an langhter.
Thawngpang dang. Vawlei Cimhnak in kum 12 hngakchia Lal Ro Mawi a nunnak liam. Thilsining cu hitihin a si. Lal Ro Mawi le a hawi le minung panga Lal Nun Kim le Lal Ro Kim, Lal Hlim Pui, Van Lal Ruat le Johny hna cu an khua Thinghlun khua pawng ah a ummi Tiva ah Nga tlai dingin an kal hna. Ruah a surtuk caah vawlei an khuar i, an um hna.
Van Lal Ruat a nu nih a hmuh hna i va tlung uh tiah a ti hna, Cu ahcun Van Lal Ruat le a hawi le pathum hna cu tlun an i thawh colh. Lal Ro Mawi le Lal Nun Kim tu cu duhsah in an um rih. Cu tlawmpal ah vawlei a cim colh. Vawlei a cimh ah hin an hawi le tlun aa thawhmi nih an hmuh manh, Rianrang in an zuan hnawh hna.
A hmun an phak ah hin Lal Nun Kim cu vawlei nih a phum dih lo a ke a lang. Lal Ro Mawi tu cu vawlei nih a chilh dih. An hawi le nih vawlei cu an huah len nain vawlei a cimh lengmang caah an chuah kho hna lo. Rianrang in inn ah an tlun i an nu le pa an chim hna. An va phak tikah cun Lal Nun Kim cu fawite in an chuah manh.
Asinain Lal Ro Mawi tucu vawlei nih a chilh dih caah an hmu kho lo. Vawlei huahnak ah hin hriamnam hmanrua hman awk a that lo caah kut in an huah. Saunawn in an huah hnu ah Lal Ro Mawi cu an chuah khawh. A nunnak chanh dingin an i zuamtuk nain chanh manh loin a nunnak a liam tiah an langhter.
Leave a Reply