Lo in a rak tlunpah ah ttek nih a tlak i a nunnak liam. Ayeyardady, Kan Soe Kone khua ah a ummi kum 29 Ko Naga Lin cu Lo rian a ttuannak in a rak tlun pah ah ttek nih a tlak i a nunnak a liam. Hi konghe pehtlaiin khuami pakhat nih a chimmi cu May ni 25 ah hithil hi a cang mi a si.
Ruahsur lio ah Lo in a rak tlung Lampi ah ttek nih a tlak i a nunnak a liam. A konglam kan theih in kan va kal hnawh i a hmun kan phak ahcun a nunnak a rak liam cang. A taksa hi zoh ah mei hma in a thimi bantuk in hliamhma aum tiah a chim. Tulio caan ah Ayeyarwady chung ah hin ruah le thli biatak a fak ngaingai.
Thlichia hran ruangah inn zong a rawkmi an um len. Culawng siloin ttek tlaknak ruangah a nunnak a liammi zong an um lenti a si. Sagaing ramthen Htantaw khua ah a ummi Ko Ohn Gy zong May ni 24 ah ttek tlaknak in a nunnak a liam tiah an chim. Amah hi ralhrang lei ah a dirmi le Pyu Saw Htee hruaitu zong a si tiah an langhter.
Thawngpang dang. Lawnglung Peng kahdohnak ah ralhrang kawlralkap minung pahnih an thi. Tuzing May ni 27 ah ralhrang kawlralkap uico rual hna cu Tanintary ramthen Lawnglung peng ah an kal hna. Khuachung an luhlai khualuhnak Signboard pawng an phak ah mipi ralkap hna nih an kah hna i minung pahnih an thi.
Hi konghe pehtlaiin mipi ralkap lei nih thanhnak an tuahmi cu ralhrang kawlralkap hna hi khualuh lai an phak zingka suimilam paruk hrawngah kan kah hna tiah an chim. Ralhrang kawlralkap hna hi motor in an ra. Ralhrang hna hi minung pahra hrawng an si lai.
Minute pahra chung kahdohnak caan hi a si. Hi kahdohnak ah ralhrang kawlralkap lei in a tlawmbik minung pahnih an thi. Mipi ralkap lei in a thimi le hliam hma atuar mi pakhat hmanh um lo tein hnu an soh tthan tiah thawngthanhnak nih an langhter.
Leave a Reply