Vawlei Cimhnak in kum 12 hngakchia Lal Ro Mawi a nunnak liam. Thilsining cu hitihin a si. Lal Ro Mawi le a hawi le minung panga Lal Nun Kim le Lal Ro Kim, Lal Hlim Pui, Van Lal Ruat le Johny hna cu an khua Thinghlun khua pawng ah a ummi Tiva ah Nga tlai dingin an kal hna. Ruah a surtuk caah vawlei an khuar i, an um hna.
Van Lal Ruat a nu nih a hmuh hna i va tlung uh tiah a ti hna, Cu ahcun Van Lal Ruat le a hawi le pathum hna cu tlun an i thawh colh. Lal Ro Mawi le Lal Nun Kim tu cu duhsah in an um rih. Cu tlawmpal ah vawlei a cim colh. Vawlei a cimh ah hin an hawi le tlun aa thawhmi nih an hmuh manh, Rianrang in an zuan hnawh hna.
A hmun an phak ah hin Lal Nun Kim cu vawlei nih a phum dih lo a ke a lang. Lal Ro Mawi tu cu vawlei nih a chilh dih. An hawi le nih vawlei cu an huah len nain vawlei a cimh lengmang caah an chuah kho hna lo. Rianrang in inn ah an tlun i an nu le pa an chim hna. An va phak tikah cun Lal Nun Kim cu fawite in an chuah manh.
Asinain Lal Ro Mawi tucu vawlei nih a chilh dih caah an hmu kho lo. Vawlei huahnak ah hin hriamnam hmanrua hman awk a that lo caah kut in an huah. Saunawn in an huah hnu ah Lal Ro Mawi cu an chuah khawh. A nunnak chanh dingin an i zuamtuk nain chanh manh loin a nunnak a liam tiah an langhter.
Thawngpang dang. Ralhrang kawlralkap nih an thahmi khuami minung panga ruak an hmuh. Magway ramthen Myaing peng Kyauk khua pawngah ralhrang hna nih khuami an thahmi ruak cu mipi ralkap hna nih an hmuh. May ni 25 ah ralhrang le mipi ralkap hna cu Kyaukkhuk khua pawngah kap hnih karlak ah kahdohnak a chuak. May ni 26 ah mipi ralkap hna nih thianhhlimnak an tuah i, ralhrang hna nih khuami minung panga an thahmi ruak hna cu an va hmuh hi a si. Kyaukkhuat khua pawngah tuni cu thianhhlimnak tuah a si i atubantuk in ralhran gnih an thahmi ruak kan hmuh hi a si.
Ralhrang hna nih an thahmi hna hi khuadang maw an si Kyaukkhuat khuami dah an si timi theih a si lo.Ralhrang kawlralkap hna nih an thami ruak hna cu mipi ralkap hna nih thatein an vui khangh tiah an langhter chih. Khuami hna cu an dihlak in a himnak hmun ah an zaam hna. Hi konghe pehtlaiin Sagaing ramthen Ayadaw peng Shwetunekung khua cu ralhrang hna nih nizan zanlei an lut i an khangh tiah theih a si. Culawng siloin Aanhlia khua in Shwetunkhua hna cu hriamnam ngan he hriamnam hme an kah hnu ah khuachung ah an lut i, khua an khangh.
Khuachung ah zeibantuk a cang timi khua dirhmun zong theih a si lo. Asinain inn cu an khangh tiah an langhter. Ralhrang hna cu Ingyin One Thousang sianginn ah an um ko rih.Apawngkam a ummi khua Htantaw Kone le Obokone khua hna cu hriamnam ngan in an kah hna. Culawng siloin ralhrang kawlralkap hna nih nizan may ni 26 zanlei suimilam pasarih ah Shan le Kaya ramri Phaykhun peng, Makhekhan khua ah an lut i, inn zong an khangh tiah Pekhon People Defense Force 2 sin theih a si.
Leave a Reply