Hakha-Falam kar Kahdohnak ah CNA Ralkap “Salai Thawng Hup Lian” a Nunnak a Liam.Nihin May 5 zinglei ah a cangmi Hakha-Falam karlak Tlangzar khua pawng kahdohnak ah CNA ralkap (sen khat) Salai Thawng Hup Lian nih ram le miphun ca ah a nunnak a pek, tiah thawngpang kan theih.
Hakha in Falam lei ah a kalmi SAC ralhrang Tank 2 telh in motor 27 hrawng cu May 4 thawk in CNA le CDF-Hakha nih lampi ah an kah hna i atu ca kan ttial lio caan zong ah hin pehzul in an i kap thluahmah. Nizaan ah Ramthlo khua inn 10 le nihin ah Tlangzar khua inn 10 hrawng SAC ralhrang nih an khangh.
Tlangzar khua inn an khanghmi azapi hi fiang in theih a si rih lo. Nizaan in nihin zinglei tiang kahdohnak ah SAC ralhrang a tlawm bik 18 an thi lai, tiah an zumh. A nunnak a liammi CNA ralkap Salai Thawng Hup Lian ruak cu a hawile ralkap pawl nih ttha tein an lak khawh, tiah thawngpang kan theih. TCJ
Hmaikor aa vuahmi CDM tuah ralhrang kawlralkap minung pathum an tlaih cang hna. PDF kongkau dottletnak tuah duh ah CDM a tuahmi ralhrang kawlralkap minung pathum an tlaih hna. Hi konghe pehtlaiin NUG Defense Minister Ye Mon nih a chimmi cu PDF sin ah CDM tuah in ngiatthlainak a tuahtu ralhrang pathum tlaih an si cang.
CDM kan tuah tiah a timi si hna seh mipi lei ah kan dir tiah a timi siseh, mizei paoh an si ah, mipi lei a lutmi hna cu dottletnak thatein tuah dingah Central Committee kan dirh. A tu tiangah Dalan ngiathlaitu timi minung pathum tlaih an si. Minung tampi cu thinlung thiang tein mipi lei ah an dir i, mipi caah ralhrang an doh hna tiah a chim.
Ngiathlaitu tlaihmi hna cu mipi ralkap sin ah chiah rih an si. Myanmar Nitlak lei ah pakhat tlaih a si i, Chak lei ah pahnih tlaih an si. Tutiang rih ahcun Myanmar laicer le thlanglei ahcun mahbantuk minung cu an um rih lo. Kan tlaihmi hna cu mipi ralkap kut chungah kan ap tiah an langhter tthan.
Min Aung Hlaing hruaimi ralhrang kawlralkap hna cu an sakhan an chuahtak hna i CDM an tuah cuahmah. CDM a tuahmi hna hi ralkap minung thongthum le palik thongsarih an um cang tiah Pyituh Pandaing i, CDM Captain Ngi Thu Tha nih a chim. Cun CDM a tuah dingmi hi minung thongthum an um. CDM tuah loin ralhrang a chuahtak mi pumpak in a ummi tampi an um rih tiah theih a si.
Leave a Reply